Эрдэнэт үйлдвэрийн ажилтнуудын дунд Хөдөлмөрийн аюулгүй байдал, эрүүл ахуйн мэдлэг, ур чадварыг нэмэгдүүлэх, хамгаалах хэрэгслийн зөв хэрэглээг хэвшүүлэх, аюулгүй ажиллагааны зөв хандлагыг төлөвшүүлэх зорилгоор “Аюулгүй ажиллагаанд авхаалжтай хандацгаая” тэмцээнийг хоёр үе шаттай зохион байгууллаа. ХАБЭА-н хэлтсээс санаачлан явуулж буй тус тэмцээний хоёр дахь шатны хаалт өнөөдөр Спорт цогцолборт болж, аваргуудыг шалгаруулав.
Тэмцээнд нийт 6 бүтцийн нэгжийн баг оролцож, хамгаалах хэрэгслийн зөв хэрэглээ, мэдлэг ойлголт, практик ур чадварын зургаан өртөө бүхий сонирхолтой даалгаврыг гүйцэтгэн хурд хүч, авхаалж самбаагаа сорин өрсөлдлөө. Хоёр дахь шатны тэмцээнд аюулгүй ажиллагааны авхаалж, ур чадвараараа Дулааны цахилгаан станцын баг тэргүүлж, Ус хангамжийн цех дэд байр, Баяжуулах үйлдвэрийнхэн гуравдугаар байрт тус тус шалгарсан.
“Нэн түрүүнд-ХАБ” уриаг ажлын байрандаа эрхэмлэн, тэмцээнд амжилттай оролцож, мэдлэг, ур чадвар, багаар ажиллах чадвараараа манлайлсан шилдэг багуудад зохион байгуулагчдын зүгээс баяр хүргэж, шагналыг ирэх сарын 04-ний өдөр болох ХЭМАБ-ын үйл ажиллагааны тайлангийн хурлын үеэр гардуулахаа мэдээллээ.
Мөн аюулгүй ажиллагаа бол зөв хандлага, хариуцлага, хамтын оролцооны цогц ойлголт гэдгийг ажилтнуудад уг тэмцээнээр дамжуулан таниулахыг зорьсон гэж зохион байгуулагчид, шүүгчид энэ үеэр онцлов.















