Монгол бөхийн уламжлал, уран мэх, хүч бярыг гайхуулсан хүчит 128 бөхийн барилдаан Орхон аймгийн Эрдэнэт хотын "CuMo Arena" цогцолборт өргөн дэлгэр болж, амжилттай өндөрлөлөө.
Монгол бөхийн дэвжээнд хүч чадал, ур чадвар, тэсвэр хатуужлаа сорин барилдсан хүчит бөхчүүдийн дундаас улсын гарди М.Лхагвагэрэл онцгойрон шалгарч, барилдааны түрүү бөхөөр тодорлоо. Харин улсын арслан Э.Оюунболд уран мэх, дайчин барилдаанаа үзүүлэн үзүүрлэж, үзэгч олныг баясгав.
Ийнхүү, барилдааны их шөвөгт улсын арслан Б.Бат-Өлзий, аймгийн арслан Н.Өсөхбаяр нар шалгаран үлдэж, хүчтэнүүдийн өрсөлдөөн улам сонирхолтой, өрсөлдөөнтэй өрнөсөн юм.
128 хүчит бөхийн хүч сорьсон энэхүү барилдаан нь Монгол бөхийн өв уламжлал, ёс жаяг, эрэмбэ дарааг эрхэмлэн дээдлэхийн зэрэгцээ бөх сонирхогчдын хувьд баяр бахдал, омогшил дүүрэн спортын нэгэн сайхан үйл явдал боллоо.
Барилдааны турш бөхчүүдийн уран мэх, хурц дайчин барилдаан, хүч чадлын өрсөлдөөнийг үзэж сонирхсон Эрдэнэт хотын төдийгүй бүс, орон нутгийн бөх сонирхогчид хүчит бөхчүүдээ халуун алга ташилтаар урамшуулж байлаа.
Эрдэнэт хотноо, "CuMo Arena"-д анх удаа зохион байгуулагдсан хүчит 128 бөхийн барилдаанд түрүүлж, үзүүрлэн, их шөвөгт шалгарсан бөхчүүддээ баяр хүргэж, цаашдын барилдаан, спортын их замналд нь өндөр амжилт хүсэн ерөөе! Монгол бөхийн босоо цагаан хийморь мөнхөд бадартугай!

























