Зэсийн баяжмал хайлуулах, боловсруулах үйлдвэрийн төсөл гараанаас хөдөллөө

“Эрдэнэт үйлдвэр” ТӨҮГ-ыг түшиглэсэн Үйлдвэрлэл, технологийн паркийн хүрээнд байгуулах Зэсийн баяжмал хайлуулах, боловсруулах үйлдвэрийн төсөлд хөрөнгө оруулж, хамтран ажиллах компанийг шалгаруулаад байна. Ингэснээр, Монгол инженерүүд, тэр тусмаа Эрдэнэт үйлдвэрийн үе үеийн уурхайчдын олон жилийн хүсэл мөрөөдөл биеллээ олох том алхам хийгдлээ. Энэхүү төсөл нь УИХ-ын баталсан “Алсын хараа-2050”, “Шинэ сэргэлтийн бодлого” зэрэг Монгол Улсын урт хугацааны хөгжлийн бодлого болон Засгийн газрын 2020-2024 оны үйл ажиллагааны хөтөлбөрт тусгагдсан 14 мега төслүүдийн нэг юм. 
Зэсийн баяжмал хайлуулах, боловсруулах үйлдвэрийн хөрөнгө оруулагчийг тодруулах сонгон шалгаруулалтын материалыг олон улсын нээлттэй цахим хуудсанд байршуулж, зэс, металлургийн чиглэлээр дэлхийд тэргүүлэгч 20 гаруй улсын нийт 55 компанид мэдээлэл хүргүүлснээс долоон улсын 13 компани уг төсөлд хөрөнгө оруулж, хамтран ажиллах саналаа ирүүлсэн. Монгол Улсын Ерөнхий сайдын 2025 оны 60 дугаар захирамжаар байгуулагдсан ажлын хэсгээс тэдгээрийн ижил төстэй төсөл хэрэгжүүлсэн туршлага, техник, технологийн шийдэл, санхүү, эдийн засгийн чадавх болон бусад холбогдох шалгуур үзүүлэлтийг харгалзан үнэлэхэд, БНХАУ-ын “China Nonferrous Metal Industry’s Foreign Engineering and Construction” компани шалгарсан байна. 
Одоогоор Ерөнхий сайдын 2026 оны 136 дугаар захирамжаар байгуулагдсан ажлын хэсэг, Монгол Улсын сайд, ЗГХЭГ-ын даргын 2026 оны 58 дугаар тушаалаар байгуулагдсан Дэд ажлын хэсгүүд төсөлд хөрөнгө оруулж, хамтран ажиллах компанитай хэлэлцээр хийх, гэрээний төслийг тохирох, эцэслэсэн хувилбарыг боловсруулан, ойрын хугацаанд Засгийн газрын хуралдаанд танилцуулахаар ажиллаж байна.
Зэсийн баяжмал хайлуулах, боловсруулах үйлдвэрийг барьж, ашиглалтад оруулснаар шинээр олон ажлын байр бий болох, дэвшилтэт технологи нутагшуулах, ашигт малтмалын боловсруулалтыг шат ахиулан хүнд үйлдвэрийг хөгжүүлэх, улс орны эдийн засагт эерэг нөлөө үзүүлэх зэрэг олон талын ач холбогдолтой. 
Мөн зөвхөн нэмүү өртөг шингэсэн катодын зэс үйлдвэрлэж экспортлох бус, харин катодын зэс боловсруулж, өндөр технологи шингэсэн дараагийн шатны эцсийн бүтээгдэхүүн болох кабель утас, зэс нунтаг, хоолой гэх зэрэг олон нэр төрлийн бүтээгдэхүүн үйлдвэрлэж илүү үр ашигтай ажиллуулах, кластер хэлбэрээр бусад үйлдвэрүүдийг хөгжүүлэх бодлого төслийн хүрээнд баримталж буйг төслийн багийнхан онцоллоо.