Хүний нөөц, захиргааны хэлтсээс шинэ ажилтнуудын “Багш, шавийн гэрээ” байгуулах үйл ажиллагааг энэ онд гурав дахь удаагаа зохион байгууллаа. Хөтөлбөрийн гол зорилго нь шинэ ажилтан ажлын байрандаа хурдан дасан зохицох, мэргэжлийн болоод ерөнхий ур чадвараа хөгжүүлэх, үйлдвэрийн үйл ажиллагааны дүрэм журмыг мөрдөх, байгууллагын соёлыг хүндэтгэн баримтлах зэрэгт багшийн дэмжлэг, зөвлөгөөн дор суралцах боломж олгоход чиглэдэг. Өнөөдөр тус хөтөлбөрийн хүрээнд шинээр ажилд орсон болон шинэ ажил албан тушаалд томилогдсон дөрвөн ажилтан өөр өөрийн багш нартай “Багш, шавийн гэрээ”-гээ үзэглэж, баталгаажууллаа.
Энэ удаагийн “Багш, шавийн хөтөлбөр”-т Төрөлжсөн архивын дарга Б.Одонтуяа, Архив, албан хэрэг хөтлөлтийн хяналтын улсын байцаагч М.Энхцэцэг, Зааварлагч, арга зүйч Г.Хонгорзул, Архивын ахлах мэргэжилтэн А.Наранбаяр нар дадлагажуулагч багшаар ажиллах бол Хүний нөөц, захиргааны хэлтсийн Дотоод зохион байгуулалт, албан хэрэг хөтлөлтийн мэргэжилтэн Б.Биндэрьяа, Мэдээллийн технологи, цахим сангийн эрхлэгч Э.Ганбаяр, Цахим сангийн гэрээт ажилтан О.Нарангоо нар шинэ ажилтны дасан зохицох ур чадварт суралцахаар боллоо.
Хүний нөөц, захиргааны хэлтсээс тогтмол хэрэгжүүлж буй тус хөтөлбөрийн онцлог, ач холбогдлын талаар Дотоод зохион байгуулалт, албан хэрэг хөтлөлтийн албаны дарга Б.Мөнхцэцэг тодотгохдоо, “Эрдэнэт үйлдвэрийн Ерөнхий захирлын энэ оны А/45 дугаар тушаалаар Хүний нөөцийн бүрдүүлэлтийн журам шинэчлэгдэж, батлагдсан. Журамд шинээр ажилд орж буй ажилтан чиглүүлэх болон дадлагажуулах хөтөлбөрт хамрагдсан байна гэж заасан байдаг. Тэгэхээр чиглүүлэх хөтөлбөр нь ажлын байртайгаа танилцах анхны өдрөөс эхэлдэг бол дадлагажих нь заавал багшийн удирдлага дор доод тал нь 3 сарын хугацаатай хэрэгжинэ. Эндээс шинэ ажилтан ажлын байрандаа дасан зохицох сууриа тавих, мэргэжлийн болон хувь хүний хөгжлийн мэдлэг чадвар эзэмших, үйлдвэрийн дотоод журам, бичиг баримт, соёлтой танилцах зэрэг олон боломжийг ажлын дадлагатай зэрэг нэг дор олж авах юм. Ингэснээр, шинэ ажилтан цаашдаа ямар нэг айдас, саад бэрхшээл багатай ажлаа хийх, туршлагажих боломжтой болдгоороо маш чухал хөтөлбөр” гэсэн юм.
“Багш, шавийн гэрээ” байгуулах үйл ажиллагааны төгсгөлд Хүний нөөц, захиргааны хэлтсийн дарга О.Отгонбаяр, хөтөлбөрт оролцогч багш, шавь нарт амжилт хүсэж, өнөөдрийн шинэ ажилтнуудын зорилго тэмүүлэл, зөв дадлууд маргаашийн Эрдэнэт үйлдвэрийн түлхүүр ажилтны үнэ цэнийг бүтээж байдгийг онцоллоо.
Нар минутад мандаж минутад жаргана.
Үс засуулвал: 
Суудал: 
