Удирдах ажилтны даваа гаргийн ээлжит шуурхай зөвлөгөөнийг Үйлдвэрлэл, техникийн бодлогын газрын дарга П.Батболор удирдаж, долоо хоногийн ажлын тайлан, төлөвлөгөөг хэлэлцлээ.
Үйлдвэрийн хэмжээнд хөдөлмөрийн аюулгүй байдлын зөрчил доголдолгүй ажиллаж байгааг ХАБЭА-н хэлтсээс мэдээлж, “CuMo Arena” цогцолборын нээлт болох гэж буйтай холбоотойгоор барилга байгууламжийн аюулгүй байдалд онцгой хяналт тавин ажиллаж байгааг онцлов. Байгаль орчин, ногоон хөгжлийн хэлтэс, Орхон аймгийн ЗДТГ, Эрүүл мэндийн газартай хамтран, Цагаан тоосны нөлөөллийн бүсэд амьдарч буй иргэдэд эрүүл мэндийн мэдлэг олгох аяныг зохион байгуулж, бүс нутгийн 4000 орчим иргэнийг хамруулсан байна. Аяныг зохион байгуулахдаа, иргэдийн амьдралын хэв маяг, өмнөх жилүүдийн эрүүл мэндийн үзлэгийн дүн шинжилгээнд суурилсан урьдчилан сэргийлэх зөвлөмж өгч, мэргэжлийн эмч нар цагаан тоосны нөлөөллийн бүсэд ажиллажээ. Тус аяны үйл ажиллагаа энэ долоо хоногт үргэлжилнэ гэж Байгаль орчин, ногоон хөгжлийн хэлтэс танилцуулав.
10 дугаар сарын үйлдвэрлэлийн төлөвлөгөөт үзүүлэлтийг дүгнэж, сар хаалтын хурал болсон талаар Үйлдвэрлэл, техникийн хэлтэс мэдээллээ. Энэ хугацаанд уурхайчид үйлдвэрлэлийн үндсэн үзүүлэлтүүдээ 100 хувиар биелүүлэн ажиллаж байна. Уурхайчид уулын цул гаргалтын төлөвлөгөөг 105.8 хувь, хөрс хуулалтыг 102.5 хувиар давуулан гүйцэтгэж, 4293 мянган тонн хүдэр олборлож, төлөвлөгөөг 108.5 хувиар биелүүллээ. Баяжуулах үйлдвэрт 3450 мянган тонн хүдэр боловсруулж, төлөвлөгөөг 101.4 хувиар, экспортод ачуулсан зэс, молибдены баяжмалын чанарын төлөвлөгөөг 100.4-106.8 хувиар тус тус биелүүлсэн байна. Энэ сард 10387 тонн зэсийн баяжмал, 506 тонн молибдены баяжмал үйлдвэрлэн, экспортод гаргалаа.
Өнгөрсөн долоо хоногт үйлдвэрийн хэмжээнд олон чухал үйл явдал өрнөсөн. Монгол-Германы хамтарсан Ашигт малтмал технологийн сургуулийн багш нар Эрдэнэт үйлдвэртэй танилцаж, “Эрдэнэтийн-Овоо” зэс, молибдены орд газрыг ашиглах ТЭЗҮ-ийн тодотгол баримт бичгийг хүлээн авах, “Чингис хаан баялгийн сан” нэгдлийн удирдлагууд Эрдэнэт үйлдвэрийн 2027 оны бизнес төлөвлөгөө, хөрөнгө оруулалтын зорилт, төлөвлөлттэй танилцах зэрэг албан үйл явдлууд болсныг Хүний нөөц, захиргааны хэлтэс мэдээлэв. Тэгвэл энэ долоо хоногт Худалдан авах ажиллагааны газраас, Үнэлгээний хороонд ажиллаж буй ажилтнуудыг мэргэшүүлэх, чадавхжуулах, худалдан авах ажиллагаанд тулгарч буй зарим асуудал, тэдгээр нь хууль дүрэмд нийцэж буй эсэх зэрэг мэдээлэл өгөх зорилгоор сургалт зохион байгуулна. Энэхүү сургалтыг Орхон аймгийн Төрийн худалдан авах ажиллагааны газартай хамтран хийх бөгөөд үүнд үнэлгээний хороонд ажилладаг мэргэжилтэн, удирдлагууд идэвхтэй оролцохыг тус газраас уриаллаа.
Мөн шинэ долоо хоногт буюу энэ сарын 05-наас “CuMo Arena” цогцолборын нээлтийн үйл ажиллагаа олон улсын “Браво” циркийн тоглолтоор эхэлнэ. Үүнтэй холбогдуулан Хамтын ажиллагаа, нийгмийн харилцааны бодлогын газрын дарга Ц.Бат-Энх хэд хэдэн чиглэлээр мэдээлэл хийлээ. Нээлтийн ажиллагааны хүрээнд болох урлаг соёл, спортын цуврал тоглолтуудын талаар ажилтнуудад мэдээлэл хүргэх, уурхайчдаа болон олон нийтийг өргөнөөр хамруулахад бүтцийн нэгжийн удирдлагууд санаачилгатай ажиллах, мэдээлэл хариуцаж түгээх ажилтантай болох, Хамтын ажиллагаа, нийгмийн харилцааны бодлогын газар, Нийгмийн харилцааны хэлтэс, нийгмийн цехүүдээс зохион байгуулж буй спортын тэмцээн, “Алхам бүрийн амт” эрүүл мэндийг дэмжих үйл ажиллагааг хавар, намрын улиралд тогтмол зохион байгуулах зэрэг чиглэлийг удирдлагуудад өгөв.
Нар минутад мандаж минутад жаргана.
Үс засуулвал: 
Суудал: 
