УДИРДАХ АЖИЛТНЫ ШУУРХАЙ ЗӨВЛӨГӨӨНИЙ ТОЙМ

ҮЙЛДВЭРЛЭЛИЙН ҮЗҮҮЛЭЛТҮҮДИЙГ ДҮГНЭЖ, ОНЫ ЭЦСИЙН ЗОРИЛТЫН ХЭРЭГЖИЛТЭД АНХААРЧ АЖИЛЛАНА

“Эрдэнэт үйлдвэр” ТӨҮГ-ын удирдах ажилтны ээлжит шуурхай зөвлөгөөнөөр, өнгөрсөн долоо хоногийн үйлдвэрлэлийн үндсэн үзүүлэлт, төлөвлөгөөний биелэлт, хөдөлмөрийн аюулгүй байдал, эрүүл ахуй, байгаль орчны чиглэлээр хэрэгжүүлсэн ажил, хөрөнгө оруулалт, бүтээн байгуулалтын төслүүдийн явц болон цаашид анхаарах асуудлуудыг хэлэлцлээ.

СПОРТ ЦОГЦОЛБОРЫН ДАРГЫГ ТУРШИЛТЫН ХУГАЦААТАЙГААР ТОМИЛЛОО

“Эрдэнэт үйлдвэр” ТӨҮГ-ын Ерөнхий захирлын 2026 оны аравдугаар сарын 18-ны өдрийн Б/1442 дугаар тушаалаар С.Лхагвабаатарыг Спорт цогцолборын даргаар гурван сарын туршилтын хугацаатай томилон ажиллуулахаар шийдвэрлэсэн. Тушаалаар, түүнийг Спорт цогцолборын Их спорт хөгжүүлэх хэсгийн ахлах дасгалжуулагчийн үүрэгт ажлаас чөлөөлж, шинэ албан тушаалд томилсон байна. Туршилтын хугацаа дуусахаас 14-өөс доошгүй хоногийн өмнө ажилтны ажлын гүйцэтгэлд дүгнэлт гаргаж, цаашид үргэлжлүүлэн ажиллуулах эсэх асуудлыг шийдвэрлэхээр тусгажээ.

ҮЙЛДВЭРЛЭЛИЙН ҮНДСЭН ҮЗҮҮЛЭЛТҮҮДИЙН БИЕЛЭЛТ 98.4 ХУВЬТАЙ БАЙНА

2026 оны аравдугаар сарын 19-ний байдлаар уулын цул гаргалтын төлөвлөгөө 103.4 хувь, хөрс хуулалтын төлөвлөгөө 116.1 хувийн биелэлттэй байна. Баяжуулах үйлдвэрийн хүдэр боловсруулалт 98.4 хувьтай байгаа бол хүдэр дамжуулалтын төлөвлөгөө 103.7 хувийн гүйцэтгэлтэй байна. Хүдэр дэх зэсийн агуулга төлөвлөсөн хэмжээнээс давж, 0.385 хувьд хүрсэн бол молибдены агуулга 0.0130 хувьтай гарсан нь төлөвлөсөн үзүүлэлтээс доогуур байна. Зэсийн металл авалт 87.58 хувьтай буюу төлөвлөгөөг давуулан биелүүлжээ. Харин молибдены металл авалт 42.50 хувьтай байгаа тул холбогдох үзүүлэлтүүдийг сайжруулахад анхаарч ажиллах шаардлагатай байна. Зэсийн баяжмалын гаргалт 30.5 мянган тонн орчимд хүрч, төлөвлөгөөний 106 хувийг биелүүлсэн бол баяжмал дахь зэсийн хэмжээ 6,783.35 тонн болж, төлөвлөгөөнөөс 373.70 тонноор давжээ. Мөн баяжмал ачих төлөвлөгөө 100.7 хувийн биелэлттэй, вагон ачилт 468 ширхэг буюу 100 хувийн гүйцэтгэлтэй байна. Үйлдвэрлэлийн үндсэн үзүүлэлтүүдийг дүгнэхдээ төлөвлөгөөний биелэлтийг хангахын зэрэгцээ технологийн горим, бүтээгдэхүүний чанар, металл авалтын үзүүлэлтийг тогтвортой хадгалж, үйлдвэрлэлийн үр ашгийг дээшлүүлэхэд анхаарч ажиллахыг онцоллоо.

ХӨРӨНГӨ ОРУУЛАЛТ, БҮТЭЭН БАЙГУУЛАЛТЫН АЖЛУУДЫГ ЭРЧИМЖҮҮЛНЭ

Ерөнхий инженер Т.Батмөнх, оны эцэс дөхөж буйтай холбогдуулан үйлдвэрлэлийн хөрөнгө оруулалт, их засвар, бүтээн байгуулалтын ажлуудын явц, төлөвлөгөөний хэрэгжилтэд анхаарч, үлдсэн хугацаанд ажлыг эрчимжүүлэх шаардлагатайг онцоллоо. Мөн өвлийн улирлын бэлтгэл ажлын хүрээнд маргаашаас эхлэн өвлийн түлшинд шилжиж, технологийн болон бусад зориулалтын техникүүдэд өвлийн дугуй суурилуулан, ашиглалтын бэлэн байдлыг хангаад байна. Үйлдвэрийн бүсийг тойрсон хамгаалалтын хашааны бүрэн бүтэн байдалд анхаарч, унасан болон цоорч гэмтсэн хэсгүүдийг нөхөн сэргээж, засварын ажлыг бүрэн дуусгахыг холбогдох бүтцийн нэгжүүдийн удирдлагуудад үүрэг болголоо. Үйлдвэрийн хэмжээнд намар, өвлийн бэлтгэл ажлын хэрэгжилт өнөөдрийн байдлаар 89.7 хувьтай байна. Өвлийн бэлтгэл ажлыг төлөвлөгөөний дагуу бүрэн хангаж, болзошгүй эрсдэлээс урьдчилан сэргийлэх, үйлдвэрлэлийн найдвартай, хэвийн ажиллагааг хангахад анхаарч ажиллаж байна. Түүнчлэн, ажилтнуудыг эрүүл мэндийн урьдчилан сэргийлэх үзлэгт батлагдсан хуваарийн дагуу хамруулж байгаа бөгөөд ажилтнуудын эрүүл мэндийг хамгаалах, хөдөлмөрийн бүтээмжийг дэмжих чиглэлээр хэрэгжүүлж буй ажлуудыг үргэлжлүүлж байна.

АЖЛЫН БАЙРНЫ ДАСГАЛ ХӨДӨЛГӨӨНИЙГ ТОГТМОЛ ХЭВШҮҮЛНЭ

 Хамтын ажиллагаа, нийгмийн бодлогын газрын дарга үйлдвэрийн нийт бүтцийн нэгжийн удирдлагуудад ажлын байрны дасгал хөдөлгөөнийг тогтмол зохион байгуулж, ажилтнуудын оролцоо, идэвхийг нэмэгдүүлэх чиглэлээр ажиллахыг үүрэг болголоо. Ажлын байрны дасгал хөдөлгөөнийг хэвшүүлэх нь ажилтнуудын эрүүл мэндийг дэмжих, хөдөлгөөний дутагдлаас урьдчилан сэргийлэх, ажлын бүтээмжийг нэмэгдүүлэхэд чухал ач холбогдолтой юм.

“CUMO ARENA”-ГИЙН НЭЭЛТ ИРЭХ САРД БОЛНО

“Эрдэнэт үйлдвэр” ТӨҮГ-ын өөрийн хөрөнгө, бүтээн байгуулалтаар бий болгосон “CuMo Arena” спорт, урлагийн цогцолборын нээлтийн арга хэмжээг ирэх арваннэгдүгээр сард зохион байгуулахаар төлөвлөжээ. Тус цогцолбор ашиглалтад орсноор спорт, урлаг, соёлын олон төрлийн арга хэмжээ зохион байгуулах боломж бүрдэж, иргэд, олон нийтэд үйлчлэх шинэ орчин бий болох юм. Ингэснээр, Эрдэнэт хотын спорт, урлаг, соёлын амьдралыг баяжуулж, үзэгчдийн оюун санаа, гоо зүйн хэрэгцээг хангах, олон нийтийн чөлөөт цагийг зөв боловсон өнгөрүүлэхэд хувь нэмэр оруулах ач холбогдолтой.

ЭРДЭНЭТ ҮЙЛДВЭРИЙГ САЛБАРЫН ШИЛДЭГ БАЙГУУЛЛАГААР БАТЛАМЖИЛЖЭЭ

Монгол Улсын орон сууц, нийтийн аж ахуйн салбарын хөгжил дэвшил, иргэдийн ажиллаж, амьдрах таатай орчин нөхцөлийг бүрдүүлэх үйлсэд үнэтэй хувь нэмэр оруулж, ажлын амжилтаараа тэргүүлсэн тул “Эрдэнэт үйлдвэр” ТӨҮГ-ын хамт олныг “Орон сууц, нийтийн аж ахуйн салбарын 2025 оны шилдэг байгууллага”-аар шалгаруулж, батламжилжээ. Хот байгуулалт, барилга, орон сууцжуулалтын сайдын батламжийг 2026 оны аравдугаар сарын 09-ний өдөр олгосон байна. Энэхүү шагнал нь үйлдвэрийн хамт олны ажлын амжилт, салбарын хөгжилд оруулж буй хувь нэмрийг үнэлсэн чухал үйл явдал боллоо. Та илгээсэн Хот байгуулалт, барилга, орон сууцжуулалтын сайдын батламжийг 2026 оны аравдугаар сарын 09-ний өдөр олгосон байна. Энэхүү шагнал нь үйлдвэрийн хамт олны ажлын амжилт, салбарын хөгжилд оруулж буй хувь нэмрийг үнэлсэн чухал үйл явдал боллоо.