Таван жил тутамд зохион байгуулдаг төрийн архивын улсын үзлэг Орхон аймагт эхэлж буйтай холбогдуулан ажлын хэсгийн нээлтийн хурал өнөөдөр Эрдэнэт үйлдвэрт боллоо. Хуралдаанд улсын үзлэгийн ажлын хэсгийн ахлагч, Газар зохион байгуулалт, геодези, зураг зүйн ерөнхий газрын дарга А.Энхманлай тэргүүтэй комиссын гишүүд, Орхон аймаг, Эрдэнэт үйлдвэрийн холбогдох байгууллагын удирдлагууд оролцож, санал солилцов.
Монгол Улсын Засгийн газрын 2026 оны 7 дугаар сарын 01-ний өдрийн 280 дугаар тогтоолоор улсын хэмжээнд буй төрийн 37 архивд улсын үзлэг зохион байгуулна. Энэ дагуу Орхон аймгийн Төрийн архив, “Эрдэнэт үйлдвэр” ТӨҮГ-ын Төрөлжсөн архивт улсын үзлэг өнөөдрөөс эхэллээ. Улсын үзлэгийн шалгуур үзүүлэлтийг Хууль зүй, дотоод хэргийн яамны Төрийн нарийн бичгийн даргын тушаалаар баталсан бөгөөд үзлэгийн явцыг хүний нөлөөлөл, оролцооноос ангид явуулах зорилгоор энэ жилээс цахим систем ашиглах болж байна.
Манай улсад Төрийн архивын улсын үзлэгийг 1984 оноос зохион байгуулж эхэлсэн. Энэ жилийн улсын үзлэгийн нэгдсэн дүнг ирэх 12 дугаар сард багтаан, Засгийн газрын хуралдаанд танилцуулж, дүгнэлт гаргах юм байна.
Улсын үзлэгийг Архивын Ерөнхий газар, Төрийн архив, Үндэсний архив, тухайн төрийн байгууллагын салбарын архивын төлөөллүүдээс бүрдсэн ажлын хэсэг зохион байгуулж, архив тус бүрд 4-өөс 5 өдөр ажиллаж, дүнг тухай бүрд нь танилцуулна. Мөн үзлэг шалгалтаас гадна тухайн байгууллагын ажилтнуудад зөвлөн туслах үйлчилгээ үзүүлэх, орон нутгийн архивуудад тулгамдаж буй асуудлыг газар дээр нь үзэж танилцан, баримтаар баталгаажуулан, үзлэгийн дүгнэлтэд тусгуулах, улмаар архивын ерөнхий газар, Засгийн газрын түвшинд шийдвэрлүүлэх, дараагийн таван жилд хийж хэрэгжүүлэх зорилтыг тодорхойлох зэрэг үр дүнд хүргэхэд онцгой анхаарна гэдгийг Улсын үзлэгийн ажлын хэсгийн ахлагч онцлов.
Нар минутад мандаж минутад жаргана.
Үс засуулвал: 
Суудал: 
