Японы Олон улсын хамтын ажиллагааны байгууллага (ЖАЙКА)-гийн Монгол дахь төлөөлөгчийн газрын дарга Мияги Кэнсүкэ тэргүүтэй төлөөлөгчид өнөөдөр “Эрдэнэт үйлдвэр” ТӨҮГ-т ажиллалаа. Айлчлалын хүрээнд зочид үйлдвэрийн Ил уурхай, Авто тээврийн цех, Баяжуулах үйлдвэрийн үйл ажиллагаатай танилцаж, Хүний нөөцийн бүрдүүлэлт, сонгон шалгаруулалт болон хүний нөөцийн үйл ажиллагааны талаар мэдээлэл сонсов.
Мөн Гэр бүл, хөдөлмөр, нийгмийн хамгааллын яам, ЖАЙКА-тай хамтран хэрэгжүүлж буй “Монгол Улсын зорилтот бүлгийн иргэдийн хөдөлмөр эрхлэлтийг дэмжих замаар бие даан амьдрах тогтолцоог бэхжүүлэх төсөл”-ийн хүрээнд хэрэгжиж буй “Ажил турших хөтөлбөр”-ийн талаар танилцуулж, хөдөлмөр эрхлэлтийг дэмжих чиглэлээр мэдээлэл солилцлоо. Тус хөтөлбөр нь урт хугацаагаар ажилгүй байгаа иргэдэд ажил эрхлэхэд шаардлагатай мэдлэг, ур чадвар эзэмшүүлэх, ажлын байранд туршиж ажиллуулах, тогтвортой хөдөлмөр эрхлэхэд нь дэмжлэг үзүүлэх зорилготой.
Орхон аймагт хэрэгжүүлсэн загвар таван төслийн хүрээнд 34 иргэн хөтөлбөрт хамрагдаж, 22 аж ахуйн нэгж, байгууллагын 30 ажлын байранд ажил туршсанаас таван иргэн байнгын ажилд орж, хоёр иргэн хувиараа хөдөлмөр эрхэлж эхэлжээ. Харин загвар зургаан төслийн хүрээнд 60 иргэн нөхцөл байдлын үнэлгээ, ганцаарчилсан зөвлөгөөнд хамрагдаж байгаа бөгөөд 18 байгууллага ажил турших үйл ажиллагаанд оролцох хүсэлт гаргасан байна. ЖАЙКА-гийн төлөөлөгчдийн айлчлалын хүрээнд үйлдвэрийн үйлдвэрлэл, хүний нөөцийн үйл ажиллагаатай танилцаж, зорилтот бүлгийн иргэдийн хөдөлмөр эрхлэлтийг дэмжих хөтөлбөрийн хэрэгжилтийн талаар мэдээлэл солилцсон юм. Мөн танхимын сургалт зохион байгуулагдах бөгөөд оролцогчид өөрийгөө танин мэдэх, харилцааны ур чадвар, бие авч явах соёл, стрессийг удирдаж бие сэтгэлээ эрүүл байлгах, багаар ажиллах чадвар, компанид ажиллах, ажил туршихад анхаарах зүйл гэх мэт ажил эрхлэхэд шаардлагатай мэдлэг, ур чадварыг эзэмшинэ. Энэ сарын 16-наас 21-ний хооронд зарим аж ахуйн нэгж байгууллагад ажил туршихаар төлөвлөөд байна.
Нар минутад мандаж минутад жаргана.
Үс засуулвал: 
Суудал: 
