“Эрдэнэтийн-Овоо зэс-молибдены ордын ашиглалтын Техник, эдийн засгийн үндэслэлийн Тодотгол-1” баримт бичгийг “Эрдэнэт үйлдвэр” ТӨҮГ-т албан ёсоор хүлээлгэн өгөх ёслолын ажиллагаа өнөөдөр Ерөнхий захиргааны 2-р байрны “Зэс” танхимд боллоо. Энэхүү үйл ажиллагаанд “Эрдэнэт үйлдвэр” ТӨҮГ-ын Ерөнхий захирал Г.Ёндон, удирдлагууд болон холбогдох мэргэжилтнүүд, “Эс Ар Ди Констракшн” ХХК-ийн Гүйцэтгэх захирал У.Соёл-Эрдэнэ, “SLR Consulting” компанийн Монгол Улс дахь салбарын захирал Родни Грэхэм (Rodney Graham) нар оролцож, төслийн үр дүн, ач холбогдлын талаар санал бодлоо хуваалцав.
“Эрдэнэт үйлдвэр” ТӨҮГ-ын Ерөнхий захирал Г.Ёндон хэлсэн үгэндээ, энэхүү ТЭЗҮ нь үйлдвэрийн 2080 он хүртэлх хөгжлийн үндэс суурийг тодорхойлсон стратегийн чухал баримт бичиг болохыг онцоллоо. Тэрбээр ордын геологийн нөөц өмнөх 2.9 тэрбум тонноос 4.6 тэрбум тонн болж нэмэгдсэн нь сүүлийн жилүүдэд хийсэн хайгуулын ажил, зах зээлийн нөхцөл байдал, техник технологийн боломжийг харгалзан шинэчлэн үнэлсний үр дүн гэдгийг тэмдэглэв. Мөн ордын нөөцийг олон улсын ЖОРК (JORC) кодын зарчим, аргачлалд нийцүүлэн үнэлж, геологи, олборлолт, боловсруулалт, дэд бүтэц, хөрөнгө оруулалт, эдийн засгийн үр ашиг, байгаль орчин болон уурхайн хаалтын асуудлыг цогцоор нь тусгасан нь цаашид олон улсын санхүүгийн байгууллага, хөрөнгө оруулагчдын шаардлагад нийцсэн төсөл хэрэгжүүлэхэд чухал суурь болно гэв. Түүнчлэн, үйлдвэрлэлийн үр ашгийг нэмэгдүүлэх, дизель түлш болон эрчим хүчний хэрэглээг бууруулах, цахилгаан болон сэргээгдэх эрчим хүчид суурилсан дэвшилтэт технологи нэвтрүүлэх, нүүрстөрөгчийн ялгарлыг багасгах шаардлага улам бүр нэмэгдэж байгааг дурдлаа. Уурхайн хаалтын төлөвлөгөөг ТЭЗҮ-д тусгасан нь хариуцлагатай уул уурхайг хөгжүүлэх, байгаль орчны нөхөн сэргээлт, ирээдүйн санхүүжилтийг урьдчилан төлөвлөхөд чухал алхам болохыг онцолсон юм.
“SLR Consulting” компанийн Монгол Улс дахь салбарын захирал Родни Грэхэм (Rodney Graham): Монголын уул уурхайн салбар олон улсын байгаль орчин, нийгэм, засаглалын стандарт болон технологийн шинэчлэлд тулгуурласан хөгжлийн шинэ үе шатанд шилжиж байгааг тэмдэглээд, Эрдэнэтийн-Овоо ордын ТЭЗҮ нь энэ өөрчлөлтийн бодит жишээ болсныг хэлэв. Тус компани “Эс Ар Ди Констракшн” ХХК-тай 2023 оны есдүгээр сараас эхлэн хамтран ажиллаж, геологи, нөөцийн үнэлгээ, уул уурхайн инженерчлэл, баяжуулалт, дэд бүтэц, байгаль орчин, уурхайн хаалт болон санхүүгийн загварчлал зэрэг олон чиглэлийн мэргэжилтнүүдийн оролцоотойгоор төслийг боловсруулжээ. Тэрбээр олон улсын туршлага, мэргэжлийн багийн хамтын ажиллагаа, ордын нөөцийн үнэлгээнд оруулсан ахлах геологич Б.Оюунбатын хувь нэмрийг онцлон тэмдэглэв.
“Эс Ар Ди Констракшн” ХХК-ийн Гүйцэтгэх захирал У.Соёл-Эрдэнэ: Төслийн хэрэгжилтийн явц, хамтын ажиллагааны үр дүнг танилцуулахдаа гурван жил гаруй хугацаанд нийт 13 мянга гаруй файл бүхий 149 гигабайт (GB) анхдагч мэдээллийг хүлээн авч, нэгтгэн боловсруулсан талаар дурдлаа. Мөн олон мянган хуудас материалыг англи хэл рүү хөрвүүлж, олон улсын зөвлөхүүдэд хүргүүлэн, техникийн зөвлөл болон мэргэжлийн байгууллагуудаар үе шаттай хэлэлцүүлж, нийт 12 завсрын тайлан, 20 техникийн тайлан боловсруулсан байна. Тэрбээр энэхүү ажлын амжилтад “Эрдэнэт үйлдвэр” ТӨҮГ-ын Ерөнхий захирал Г.Ёндон болон инженер, техникийн ажилтнуудын идэвхтэй оролцоо, хамтын ажиллагаа чухал үүрэг гүйцэтгэснийг онцлов. Төслийн ажлын хэсэгт үйлдвэрийн 32 ажилтан албан ёсоор томилогдож, хэрэгжилтийн явцад 60 гаруй инженер, техникийн ажилтан мэдлэг, туршлагаа дайчлан ажилласан нь захиалагч, гүйцэтгэгч талуудын мэргэжлийн түншлэлийн бодит илэрхийлэл болсныг тэмдэглэлээ.
ТЭЗҮ-д тусгасан технологийн шинэчлэлийн хүрээнд уурхайн тээврийн системийг цахилгаан эрчим хүчээр хангах дэвшилтэт шийдлийг үе шаттай нэвтрүүлэх, олон тонны даацтай 40 орчим тээврийн хэрэгсэл ашиглах, 10 МВт-ын сэргээгдэх эрчим хүчний эх үүсвэрийг төлөвлөх зэрэг шийдлүүдийг тусгажээ. Эдгээр технологийг хэрэгжүүлснээр нүүрстөрөгчийн ялгарлыг 40-50 хувь, эрчим хүчний зардлыг 20-25 хувиар бууруулах боломжтой гэж тооцсон байна.
Ийнхүү, ордын геологийн нөөц, ашиглалтын боломж, үйлдвэрлэлийн хүчин чадал, технологийн шинэчлэл, эдийн засгийн үр ашиг болон байгаль орчны хариуцлагыг цогцоор нь тодорхойлсон “Эрдэнэтийн-Овоо ордын ТЭЗҮ-ийн Тодотгол-1” нь Эрдэнэт үйлдвэрийн урт хугацааны тогтвортой хөгжлийг хангах бодлогын чухал баримт бичиг болж байна. Энэхүү үйл ажиллагааны төгсгөлд “Эс Ар Ди Констракшн” ХХК-ийн Гүйцэтгэх захирал У.Соёл-Эрдэнэ ТЭЗҮ-ийн баримт бичгийг “Эрдэнэт үйлдвэр” ТӨҮГ-ын Ерөнхий захирал Г.Ёндонд албан ёсоор гардуулан өгч, холбогдох хүлээн авах болон гэрээ дүгнэсэн актад гарын үсэг зурж баталгаажууллаа.
Нар минутад мандаж минутад жаргана.
Үс засуулвал: 
Суудал: 
