“Эрдэнэт” үйлдвэрийн Геологи хайгуулын экспедиц үүсэж байгуулагдсаны түүхт 40 жилийн ойг энэ сарын 23-ны өдөр ёслол төгөлдөр тэмдэглэж, үе үеийн геологичид, уурхайчид, ахмад ажилтнуудынхаа олон жилийн хөдөлмөр, бүтээлч үйлс, мэргэжлийн ур чадварыг алдаршууллаа. Ойн баярын үйл ажиллагааг нээж, экспедицийн дарга, Хөдөлмөрийн гавьяаны улаан тугийн одонт М.Дамдинсүрэн хэлсэн үгэндээ: “Дөчин жил гэдэг бол он цагийн энгийн хэмжүүр бус, уулын оргил, талын хөндий, алс хээрт ажилласан хөдөлмөрөөр хэмжигдэх нөр их хичээл зүтгэл, бүтээн байгуулалтын түүх юм” хэмээн онцоллоо. Тэрбээр экспедицийн хөгжил дэвшил, ололт амжилтыг бүтээлцсэн үе үеийн ахмад буурлууддаа гүн талархал илэрхийлж, хамт олны эв нэгдэл, нөхөрлөл, мэргэжлийн ур чадвар нь байгууллагын цаашдын хөгжил, амжилтын бат бөх үндэс болохыг тэмдэглэв. Ойн баярын үеэр олон жил үр бүтээлтэй ажиллаж, салбарынхаа хөгжилд үнэтэй хувь нэмэр оруулсан ажилтан, ахмад мэргэжилтнүүдийн хөдөлмөр зүтгэлийг төр, яам, орон нутаг болон мэргэжлийн байгууллагын шагналаар үнэлж, урамшууллаа. Тухайлбал, Хөдөлмөрийн хүндэт медалиар цооног өрөмдөгч Г.Тогтох, ахмад ажилтан С.Чулуунзагд нар шагнагдсан бол Тэргүүний геологич цол, тэмдгээр Ө.Цэрэгхүү, Э.Бөх-Очир нарын хөдөлмөр, мэргэжлийн ур чадварыг үнэлэв. Мөн Тэргүүний уурхайчин цол, тэмдгээр Б.Энхтүвшин болон бусад ажилтан, ахмад мэргэжилтнүүд шагнууллаа. Түүнчлэн яам, Орхон аймаг, Өрөмдлөгийн холбооны нэрэмжит шагналаар олон эрхмийн хөдөлмөр бүтээлийг үнэлж, салбарын хөгжилд оруулсан хувь нэмрийг нь алдаршуулсан нь ойн баярын онцлох үйл явдлын нэг байв. Эдгээр шагнал нь зөвхөн хувь хүний хөдөлмөрийн үнэлгээ төдийгүй геологи хайгуулын салбарын хөгжилд үнэтэй хувь нэмэр оруулсан үе үеийн ажилтан, мэргэжилтнүүдийн зүтгэл, тууштай байдлын илэрхийлэл юм. Баярын үйл ажиллагаанд төр, салбарын байгууллагын төлөөлөл, үе үеийн удирдлага, ахмад геологичид, нийт ажилтан, албан хаагчид оролцож, байгууллагынхаа түүхэн замнал, ололт амжилтаа дурсан хуваалцлаа. Мөн хүндэтгэлийн үйл ажиллагаа, урлагийн тоглолтоор ойн баяраа тэмдэглэн, үе үеийн ажилтнуудынхаа эв нэгдэл, нөхөрлөлийг бататгав. Геологи хайгуулын экспедицийн 40 жилийн түүх бол эх орныхоо газрын хэвлийн баялгийг нээн илрүүлэх их үйлсэд мэдлэг чадвар, хүч хөдөлмөрөө зориулсан үе үеийн геологичид, уурхайчид, ажилтан албан хаагчдын хичээл зүтгэл, тэсвэр хатуужил, хамтын бүтээн байгуулалтын түүх юм. Түүхэн ойгоо тэмдэглэж буй Геологи хайгуулын экспедицийн хамт олондоо цаашдын ажил үйлсэд нь өндөр амжилт, эрүүл энх, аз жаргал, шинэ ололт амжилтын дээдийг хүсэн ерөөе!
Нар минутад мандаж минутад жаргана.
Үс засуулвал: 
Суудал: 
