Ерөнхий захиргааны ажилтнуудын спортын тэмцээн эхэллээ

Ажилтнуудын бие бялдрыг хөгжүүлэх, эрүүл амьдралын хэв маягийг төлөвшүүлэх, спортоор хичээллэх идэвх оролцоог нэмэгдүүлж, хамт олны эв нэгдэл, багаар ажиллах чадварыг бэхжүүлэх, чөлөөт цагийг үр өгөөжтэй өнгөрөөх зорилгын дор зохион байгуулдаг “Эрдэнэт үйлдвэр” ТӨҮГ-ын Ерөнхий захиргааны ажилтнуудын “Спортын тэмцээн-2026” эхэллээ. Спортын таван төрөлт тэмцээний нээлтэд Ерөнхий инженер Т.Батмөнх, Захиргаа, удирдлага, санхүүгийн газрын дарга Д.Баярбат, Хамтын ажиллагаа, нийгмийн харилцааны бодлогын газрын дарга Ц.Бат-Энх тэргүүтэй газар, хэлтэс, бүтцийн нэгжүүдийн удирдлагууд оролцож, баг тамирчдадаа амжилт хүсэв.

Тэмцээний эхний өдөр волейбол, дартсын төрлүүдээр эхэлж, волейболын тэмцээнд нийт зургаан баг авхаалж самбаагаа сорин, өрсөлдлөө. Тус тэмцээний тэргүүн байранд Т.Батмөнх ахлагчтай Үйлдвэрлэл, техникийн бодлогын газар, Үйлдвэрлэл, техникийн хэлтэс, ХАБЭА-н хэлтэс, Механикийн хэлтэс, Эрчим хүчний хэлтэс, Геологи маркшейдерийн хэлтсийн хамтарсан баг шалгарч, дэд байрыг Б.Энхжин ахлагчтай Захиргаа, удирдлага, санхүүгийн газар, Дотоод хяналт, мониторингийн хэлтэс, Гадаад харилцаа, экспортын хэлтэс, Хүний нөөц, захиргааны хэлтсийн хамтарсан баг, гутгаар байрыг Ц.Эрдэнэбат ахлагчтай Хамтын ажиллагаа, нийгмийн харилцааны бодлогын газар, Нийгмийн харилцааны хэлтэс, Мэдээллийн технологийн хэлтэс, Хуулийн хэлтэс, Барилга байгууламжийн хяналт, төлөвлөлтийн хэлтэс, Гамшгаас хамгаалах штабын хамтарсан баг эзэлсэн байна.

Ганцаарчилсан эрэгтэй, эмэгтэй болон багийн төрлөөр зохиогдсон Дартсын тэмцээний эрэгтэй ангилалд 2-р багийн тамирчин Б.Одгарьд түрүүлж, 5-р багийн тамирчин Б.Мягмаржаргал дэд байр, 6-р баг буюу Мустанг багийн тамирчин С.Эрдэнэбилэгт гуравдугаар байранд тус тус шалгарсан бол эмэгтэй ангилалд 2-р багийн тамирчин А.Дэжидмаа тэргүүлж, Мустанг багийн тамирчин Т.Отгонзаяа, 4-р багийн тамирчин Д.Цэндсүрэн нар удаах байрыг эзэллээ. Дартсын багийн төрөлд Т.Батмөнх ахлагчтай 1-р баг, С.Эрдэнэбилэгт ахлагчтай Мустанг баг, Б.Батмөнх ахлагчтай 4-р баг эхний байрт шалгарсан байна.

Ерөнхий захиргааны ажилтнуудын “Спортын тэмцээн-2026” волейбол, корнхол, дартс, олс таталт, хөгжөөнт буухиа гэсэн спортын таван төрлөөр гурав хоногийн турш өрсөлдөх бол тэмцээний сүүлийн өдөр хөгжөөн дэмжигчдийн дунд сагсан бөмбөгийн шидэлтийн тэмцээн болох юм. Тэмцээн өнөөдөр корнхол төрлөөр үргэлжилнэ.