“Эрдэс боловсруулалт-2026” олон улсын эрдэм шинжилгээ, онол практикийн бага хурлын хүрээнд ШУТИС-ийн харьяа Эрдэнэт цогцолбор их сургууль, “Грийн Химистри” ХХК-тай хамтран ажиллах санамж бичигт гарын үсэг зурлаа. Санамж бичигт Эрдэнэт цогцолбор их сургуулийн захирал, доктор Д.Заяабаатар, Грийн Химистри ХХК-ийн захирал, Химийн ухааны доктор Б.Даваацэрэн нар гарын үсэг зурж, ёслолд Эрдэнэт цогцолбор их сургуулийн Коосэн коллежийн оюутан, сурагчид оролцов.
Эрдэнэт цогцолбор их сургууль, “Грийн химистри” ХХК-ийн хамтын ажиллагаа 2024 онд “Дэлхийн ур чадвар”-ын тэмцээнд оролцогчдыг бэлдэх, дэмжих чиглэлээр эхэлсэн. Улмаар 2025 онд “Монгол ур чадвар” тэмцээний үндэсний ялагчаар тодорсон Эрдэнэт цогцолбор их сургуулийн Коосэн коллежийн химийн инженерчлэлийн ангийн оюутан Э.Саруултөгөлдөрийг “Дэлхийн ур чадвар”-ын тэмцээнд оролцуулах, бэлдэх, дадлага туршилт хийлгэх, багшийн хамт зардлыг нь гаргах зэргээр хамтран ажиллажээ. Ингэснээр үндэсний ялагч Э.Саруултөгөлдөр, “Дэлхийн ур чадвар”-ын тэмцээнд амжилттай оролцож, Монгол хүүхдүүд химийн шинжлэх ухаанаар дэлхийн чансаанд дээгүүр байгааг онооны үзүүлэлтээрээ илэрхийлээд ирсэн байна. Энэхүү хамтын ажиллагааг цаашид илүү өргөн хүрээнд бэхжүүлж, “Монгол химичид Дэлхийд” хөтөлбөрийг хэрэгжүүлэх зорилгоор талууд хамтын ажиллагааны санамж бичгийг үзэглэж, баталгаажууллаа.
Мөн хоёр тал сургалт судалгаа, академик түншлэлийг хөгжүүлэх хүрээнд “Монгол ур чадвар” болон “Дэлхийн ур чадвар” тэмцээний стандартын дагуу химийн лабораторийн технологи төрлийн сорилт даалгаврын сан бүрдүүлэх, оюутан багш нарыг дадлагажуулах, шинжээч багш бэлтгэх, төгсөгчдөд ажлын байр санал болгох, ажлын байрны өдөрлөг зохион байгуулах, эрдэм шинжилгээ, судалгааны хурал уулзалт хийх, оюутны судалгаа, шинжилгээний ажлыг дэмжих зэрэг олон талт хөтөлбөрийг хамтран хэрэгжүүлж, үр дүнг тогтмол хэлэлцэхээр боллоо.
“Грийн Химистри” ХХК нь химийн бодисын худалдаа, лаборатори байгуулах чиглэлээр Эрдэнэт үйлдвэртэй олон жил хамтран ажиллаж ирсэн. Тус компани үндсэн үйл ажиллагааныхаа зэрэгцээ залуу химичдийг дэмжих, өсвөр үеийнхнийг химийн шинжлэх ухаанд дур сонирхолтой болгох зэргээр олон ажлууд зохион байгуулдаг. Тухайлбал, улс, бүс нутгийн химийн олимпиад, “Химийн урвалын гайхамшигт агшин”, “Шинжлэх ухааны бяцхан шидтэнүүд” гэх зэрэг тэмцээнүүдийг тогтмол зохион байгуулж, ивээн тэтгэж иржээ. Энэ үеэр, захирал Б.Даваацэрэн ярихдаа, “Монгол улсад таван их дээд сургуульд химичдийг бэлтгэж байгаа ч дунд мэргэжлийн химичдийг бэлтгэх, үүнд суралцах хүүхдийн тоо харьцангуй цөөн байдаг. Ер нь уул уурхай, тэр тусмаа баяжуулах үйлдвэрүүдэд ажиллах химичдийн хүний нөөцийн гол хүчийг Коосэн хөтөлбөрөөр төгссөн мэргэжилтнүүд бүрдүүлэх учраас энэ чиглэлээр суралцагсад нэмэгдэж, олон болоосой гэсэн үүднээс “Монгол химичид Дэлхийд” хөтөлбөрийг санаачлан, дэмжин хэрэгжүүлэхийг зорьж байна” гэсэн юм.
Нар минутад мандаж минутад жаргана.
Үс засуулвал: 
Суудал: 
