Баяжуулах үйлдвэрийн анхан шатны 128 удирдах ажилтан “Удирдахуйн чадамж” хөгжлийн хөтөлбөрийн сургалтад хамрагдлаа. Тус сургалтыг цехийн захиргаанаас санаачлан зохион байгуулж, “Багш боловсролын шинэчлэл” ТББ-ын багш, Хөдөлмөр ба боловсролын бодлого судлаач, Чадамжийн үнэлгээний үндэсний сургагч, доктор Б.Мянган удирдаж явуулав.
Сургалтын хүрээнд анхан шатны удирдах ажилтнууд “Сайн удирдагч гэж хэн бэ”, “Мэргэжилтнээс удирдагч руу шилжих шилжилт”, “Удирдахуйн үндсэн чадамжууд”, “Хүнээр дамжуулан үр дүнд хүрэх нь”, “Ажилтны онцлогт нийцүүлэн удирдах”, “Удирдагчийн өдөр тутмын харилцааны чадварууд” зэрэг сэдвээр хэлэлцүүлэгт оролцож, санал бодлоо солилцсон байна. Өөрөөр хэлбэл, тус сургалтыг илтгэл, лекц хэлбэрээр бус, оролцогчдын өөрийн ажлын туршлага, бодит нөхцөлд тулгуурласан богино хэлэлцүүлэг, асуулт хариулт, эргэцүүлэл, тодорхой жишээ хосолсон оролцооны аргаар зохион байгууллаа. Мөн сургалтын үеэр оролцогчдын ажлын бодит нөхцөл, хүлээлт, хэрэгцээг тодруулах зорилгоор асуумж авсан байна. Уг асуумжийн үр дүнг 18 сарын турш үргэлжлэх хөгжлийн хөтөлбөрийн хэрэгжилт болон ажлын байрны нөхцөлтэй уялдуулан ашиглах юм.
Өдөр тутмын ажлын байранд ажилтнуудтай шууд харилцаж, чиглүүлэх үүрэг бүхий анхан шатны удирдах ажилтнуудад сайн мэргэжилтэн болон сайн удирдагчийн үүрэг, чадамжийн ялгааг эргэцүүлэн харах, шаардлагатай удирдахуйн үндсэн чадамжуудыг танин мэдэх, ажилтны ялгаатай онцлогт нийцүүлэн удирдах арга барилын ач холбогдлыг ойлгох, удирдагчийн өдөр тутмын харилцаанд хэрэглэгдэх сонсох, асуух, чиглүүлэх, эргэх холбоо өгөх чадварын талаар суурь ойлголт авах, 18 сарын хөгжлийн хөтөлбөрийн зорилго, хөгжлийн замналтай танилцах зэрэг олон боломжийг нэг дор цогцоор нь нээж буйд сургалтын ач холбогдол оршиж байгааг сургагч багш онцолсон. Түүнчлэн, анхан шатны удирдах ажилтны үүргийг зөвхөн үйлдвэрлэлийн ажлыг зохион байгуулах хүрээнд бус, хүн, баг, гүйцэтгэл, хөгжлийг удирдах үүрэгтэй холбох, өөрийн удирдах арга барил, хөгжүүлэх шаардлагатай ур чадварын талаар эргэцүүлэх зэрэг ойлголт, мэдлэгийг эзэмшүүлснээрээ онцлог байв.
Нар минутад мандаж минутад жаргана.
Үс засуулвал: 
Суудал: 
