Телевизийн сэтгүүлчээс эхэлсэн хэвлэлийн салбарын орон зай дахь аялал минь сонин сэтгүүл, ном товхимол гээд цаасан дээр бичиглэж үлдээх бүтээл туурвилын ертөнцөд үргэлжилж байна. Тэр тусмаа ажил амьдралын эргүүлэг, хувь заяа “Өнөөгийн Эрдэнэт” сонинтой уяж, зуун дамжсан уурхай, уурхайчдын түүхийг бичих аз тохиол руу хөтөлж иржээ.
Сэтгүүлч хүний хамгийн том чадамж, мэргэжлийн өгөгдөл бол хөрвөх ур чадвар гэж боддог. Тийм үнэлэмж ч манай салбарт бий. Телевиз, радио, цахим сэтгүүл зүйд хүч чадлаа сорьж байхдаа сонинд бичих, сэтгүүл эрхлэх далд хүсэл эрмэлзэл үргэлж дагаж явдаг байв. Тэрхүү хүсэл мөрөөдөл минь шинжлэх ухаан, үйлдвэрлэл танин мэдэхүйн “Эрдэнэт хөгжил” сэтгүүл, “Өнөөгийн Эрдэнэт” сониноор дамжин биеллээ олсон юм. Сонины нийтлэл бичиж сурвал сэтгүүл зүйн бүх төрөлд ажиллаж чадна гэж онол, дүрэм хэвлэл мэдээллийн салбарт үйлчилдэг. Сэтгүүлчийн ур чадварын суурь нь сонины редакцад тавигддаг болохоор тэр буй заа.
“Өнөөгийн Эрдэнэт” сонины редакцыг өдий зэрэгт хүргэж, өөрийн өнгө төрхөө олоход олон сайхан эрхэм сэтгүүлчид, уран бүтээлчдийн билиг авьяас, оюун санаа, мэдлэг чадвар шингэсэн юм. “Ажилчны үг” нэртэй анхны дугаарыг ахмад сэтгүүлч Д.Ёндонравцаг эрхэлж, “Өнөөгийн Эрдэнэт”-ийг Монголын нэрт сэтгүүлч Ө.Тогоо үндэслэж, Р.Цэрмаа, Т.Батчулуун, Р.Оюун-Эрдэнэ, Ж.Оюун, Я.Энхтуяа, М.Одгэрэл нарын үе үеийн олон сэтгүүлчид үргэлжлүүлэн өнөө цагт авч иржээ. Уран бүтээлчдийн ган үзэгний торгон ир, үгийн мэргэнээр орон нутгийн шилдэг хэвлэл болтлоо хөгжиж, батжиж ирсэн “Өнөөгийн Эрдэнэт” сониныхоо 1000 дахь дугаарыг эрхлэх хувь завшаан дор бяцхан дурсамж, сэтгэгдлээ тэрлэж байгаадаа таатай байна.
Цаг хором улиран оддог ч цадиг түүх зууныг өртөөлөн үлдэнэ. Монголчуудын бахархалт Эрдэнэт үйлдвэрийн түүхэн он жилүүдийг баяр бахдал, ололт амжилт, хүндрэл бэрхшээл, үйлс бүтээлтэй нь бичиж үлдээхдээ мянган өөр өнгө, үзэл санаа, хэлбэр агуулга, мэдрэмж сэтгэл тээж буй “Өнөөгийн Эрдэнэт” сонин бидний үнэт өв, бүтээл туурвилын дундаршгүй ундарга билээ.
Уурхайчид, уншигчид та бүхэндээ “Өнөөгийн Эрдэнэт” сонины 1000 дахь дугаарын халуун мэндчилгээг дэвшүүлье.
Нар минутад мандаж минутад жаргана.
Үс засуулвал: 
Суудал: 
