“Эрдэнэт үйлдвэр” ТӨҮГ-ын Хөдөлмөрийн аюулгүй байдал, эрүүл ахуйн хэлтэс байгуулагдсаны түүхт 50 жилийн ойн баярын хурал өнөөдөр “Оюу” танхимд боллоо. Баярын хурад Орхон аймгийн ИТХ-ын дарга Д.Мөнхбат, Хөдөлмөрийн аюулгүй байдал эрүүл ахуйн зөвлөлийн дарга, Орхон аймгийн Засаг даргын орлогч Б.Мөнхдалай, Эрдэнэт үйлдвэрийн Ерөнхий захирал, Монгол Улсын Хөдөлмөрийн баатар Г.Ёндон, Мэргэшсэн ХАБЭА-н мэргэжилтнүүдийн холбооны Тэргүүн, Аж үйлдвэрийн гавьяат ажилтан С.Давааням, Гавьяат уурхайчин Д.Цагаан-Эрдэнэ, Орхон аймгийн ҮЭ-ийн холбооны дарга Түвшинжаргал, Эрдэнэт үйлдвэрийн ҮЭ-ийн холбооны дарга Мөнгөншагай болон тус хэлтсийн үе үеийн удирдлагууд, ахмадууд, инженерүүд, ажилтан албан хаагчид оролцов.
Хурлыг нээж, Эрдэнэт үйлдвэрийн Ерөнхий захирал үг хэлэхдээ, Хагас зуун жил гэдэг хүний амьдралд урт хугацаа, харин үйлдвэрийн газрын хувьд арвин туршлага хуримтлуулсан, түүнийгээ хэрэгжүүлэхийн төлөө хичээн зүтгэсэн он жилүүд байдаг. Өнөөдөр Эрдэнэт үйлдвэрт 7000 гаруй ажилтан 121 нэр төрлийн ажлын тусгай хувцас, хамгаалах хэрэгслээр хангагдан, хэвийн бус нөхцөлд ажилладаг 4500 гаруй ажилтан 15 төрлийн хор саармагжуулах бүтээгдэхүүнийг тасралтгүй авч, өдөрт дунджаар 4500 ажилтанд халуун хоолоор үйлчилж байна. Эдгээр тоо бүрийн цаана ХАБЭА-н хэлтсийн ажилтнуудын өдөр тутмын хариуцлага, анхаарал, хөдөлмөр зүтгэл бий. Хэдхэн мэргэжилтнээс эхэлсэн хэлтэс өнөөдөр Хөдөлмөрийн аюулгүй байдлын товчоо, Эрүүл ахуйн товчоо, Цацрагийн аюулгүй байдлын товчоо гэсэн бүтэцтэй, олон чиглэлийг хамарсан мэргэжлийн тогтолцоо болон хөгжсөөр байгааг онцлоод, хүн хамгаалахын төлөө ажилладаг мэргэжилтнүүдэд баярын мэнд дэвшүүлсэн юм.
Энэ үеэр ХАБЭА-н хэлтэс хагас зууны түүхээ дүрс бичлэгээр баримтжуулан, кино бүтээлээр мөнхөлснөө толилуулав. 1976 оны 10 дугаар сарын 01-нд Ерөнхий инженерийн хөдөлмөр хамгаалал, техникийн аюулгүй байдал хариуцсан орлогчийг анх томилсноор үйлдвэрийн газрын Хөдөлмөрийн аюулгүй байдал, аж байдал, аюулгүй ажиллагааны анхдагч суурь тавигджээ. Улмаар 1977 онд Хөдөлмөр хамгаалал, техник, аюулгүй байдлын хэлтэс албан ёсоор байгуулагдсан юм. 1991 онд Хөдөлмөрийн хэлтсийн дэргэд Үйлдвэрлэлийн эрүүл ахуйн лаборатори байгуулагдаж, ажлын байрны тоосжилт, хорт бодис, дуу шуугиан, чичиргээ зэрэг сөрөг хүчин зүйлсийг шинжлэх ухааны үндэслэлтэйгээр хэмжиж, үнэлэх шинэ шат эхэлсэн. 1997 онд хөдөлмөр хамгааллын удирдлагын систем батлагдаж, 2008 онд 18001 олон улсын стандарт нэвтрүүлж, Монгол Улсад анх удаа гэрчилгээ авч байжээ. 2021 оноос Хөдөлмөрийн аюулгүй байдал, эрүүл ахуйн менежментийн тогтолцоондоо ISO 45001 стандарт нэвтрүүлэн ажиллаж байна.
Өнөөдөр Эрдэнэт үйлдвэрийн 26 бүтцийн нэгжид хөдөлмөрийн аюулгүй байдал, эрүүл ахуйн асуудал хариуцсан нийт 78 мэргэжилтэн ажлын байрны аюулыг тодорхойлон, тэдгээрийг арилгахын төлөө ажиллаж байна.
Ойн баярын энэ өдөр Монгол Улсын Ерөнхийлөгчийн зарлигаар Ус хангамжийн цехийн ХАБЭА-н товчооны инженер С.Дашдорж Алтангадас одонгоор, ХАБЭА-н хэлтсийн Эрүүл ахуй товчооны хөдөлмөрийн эрүүл ахуйч О.Орхончимэг Хөдөлмөрийн хүндэт тэмдгээр энгэрээ мялаалаа. Мөн Засвар, механикийн зоводын ХАБЭА-н товчооны инженер Э.Чинсанаа, Автотээврийн цехийн ХАБЭА-н товчооны инженер П.Пүрэвсүрэн нар Тэргүүний уурхайчид цол тэмдгээр, Барилга засварын цехийн ХАБЭА-н товчооны инженер Э.Нандинцэцэг Хөдөлмөрийн Тэргүүний ажилтан, ХАБЭА-н хэлтсийн инженер С.Баярцэцэг Хөдөө аж ахуйн Тэргүүний ажилтан цол тэмдгээр шагнагдав.
Нар минутад мандаж минутад жаргана.
Үс засуулвал: 
Суудал: 
