Засвар, механикийн заводын өргөтгөл шинэчлэлийн ажил үе шаттай үргэлжилж байна

Эрдэнэт үйлдвэрийн Засвар, механикийн заводын үйлдвэрлэлийн хүчин чадлыг нэмэгдүүлэх, үндэсний машин үйлдвэрлэлийн суурийг бэхжүүлэх зорилтын хүрээнд Механик цехийн өргөтгөлийн барилгын ажил үргэлжилж байна.
 Монгол Улсын Их Хурлын 2020 оны 24 дүгээр тогтоолоор баталсан “Монгол Улсын Засгийн газрын 2020-2024 оны үйл ажиллагааны хөтөлбөр”-ийн 3.2.1.2 дахь заалт болон “Эрдэнэт үйлдвэрийг 2031 он хүртэл хөгжүүлэх үндсэн чиглэл”-д Засвар, механикийн заводыг үндэсний машин үйлдвэрлэлийн суурь болгон хөгжүүлэх, үйлдвэрлэлийн хүчин чадлыг хоёр дахин нэмэгдүүлэх зорилт тусгагдсан. Энэхүү зорилтын хүрээнд Цутгуурын цехийн бүтээгдэхүүн үйлдвэрлэх хүчин чадлыг жилд 5200 тонноос 7000 тоннд, Механик цехийн хүчин чадлыг 3355 тонноос 5920 тоннд хүргэхээр төлөвлөсөн юм. Үйлдвэрлэлийн хүчин чадлыг нэмэгдүүлэх өргөтгөл, шинэчлэлийн ажлын хүрээнд Цутгуурын цехийн өргөтгөлийн барилгыг 2025 онд хүлээн авч, 2026 оны эхний хагас жилд суурь машин, тоног төхөөрөмжүүдийг угсарч суурилуулан бүрэн ашиглалтад оруулаад байгаа юм.
Харин Механик цехийн өргөтгөлийн барилгын ажлыг 2026 оны дөрөвдүгээр сараас эхлүүлсэн бөгөөд “Би Энд Би констракшн” ХХК гүйцэтгэж байна. Нийт 144 метр урт, 30 метр өргөн, 4320 ам метр талбай бүхий уг өргөтгөл нь үйлдвэрлэлийн орчин, хүчин чадлыг нэмэгдүүлэхэд чухал ач холбогдолтой төсөл юм. Өнөөдрийн байдлаар өргөтгөлийн барилгын суурь болон шалны ажлууд бүрэн дуусаж, хана, дээврийн угсралт болон инженерийн дэд бүтцийн ажлууд үргэлжилж байна. Барилгын ажлын гүйцэтгэл 63 хувьд хүрчээ.
Механик цехийн өргөтгөлийг ашиглалтад оруулснаар Засвар, механикийн заводын үйлдвэрлэлийн хүчин чадлыг нэмэгдүүлэх, бүтээгдэхүүний нэр төрөл, үйлдвэрлэлийн боломжийг өргөжүүлэх, үндэсний машин үйлдвэрлэлийг хөгжүүлэхэд бодит хувь нэмэр оруулах юм.