Баяжуулах үйлдвэрийн Өөрөө нунтаглах хэсэгт хийгдэж буй Хүдэр бэлтгэх нэгдүгээр шатны бутлуурын өргөтгөлийн бетон суурь цутгалт өчигдөр бүрэн дуусжээ. Барилгын сууринд нийт 4300 м3 бетоныг 56 цагийн турш тасралтгүй горимоор цутгаж хийсэн байна. Суурийн бетон цутгалтад усан хөргөлтийн ухаалаг систем ашигласан бөгөөд БНХАУ-ын мэргэжилтнүүд төслийн талбайд бетоны хөргөлтийг хариуцан ажиллажээ. Мөн өргөтгөлийн том бутлалтын барилгын эхний гурван давхрын цутгалтыг энэ онд дуусгахаар төлөвлөж буйг төслийн зохицуулагч, Баяжуулах үйлдвэрийн Үйлдвэр техникийн товчооны Тэргүүлэх инженер М.Гантулга онцлов.
Хүдэр бэлтгэлийн нэгдүгээр шугамын шинэчлэлийн хүрээнд Хүдэр бэлтгэх нэгдүгээр шатны бутлуурын шинэчлэл, Өндөр даралтын булт нунтаглагчийн технологийг Монгол Улсад анх удаа нэвтрүүлэх юм. Одоогоор хүдэр бэлтгэх нэгдүгээр шатны бутлуурын цогц инженерчлэлийн ажил бүрэн хийгдсэн бөгөөд уг ажлыг Metso компани гүйцэтгэжээ. Тоног төхөөрөмжийг Финлянд улсын Metso, Франц улсын Tecman, Хятад улсын Juzhao, Швед улсын Konecranes, Герман улсын Deichman, АНУ-ын Eriez, цахилгаан тоног төхөөрөмжийг ABB, Hitachi, EH, Schenk, Allgrand компаниуд үйлдвэрлэж, нийт тоног төхөөрөмжийн 95 хувийг төслийн талбайд татаж аваад байна. Түүнчлэн, шинэчлэлийн ажилд шаардлагатай тоног төхөөрөмжийг нийлүүлэх, туршилт, тохируулга хийх ажлын гүйцэтгэгчээр “ОремТрейд” ХХК, барилга угсралтын ажлын гүйцэтгэгчээр “Эрдэнэтлайт” ХХК-иуд тус тус ажиллаж байна. Нэгдүгээр шатны бутлуурыг шинэчлэх төсөл нь үндсэн зургаан барилга байгууламжтай. Эдгээр байгууламжаар өндөр төвөгшил бүхий том бутлалтын хэсгийн барилга нь газар доор 6 давхар буюу 32 метр, газар дээр 20 метр өндөр байхаар төлөвлөжээ.
Өргөтгөлийн гадна цахилгаан хангамжийн гүйцэтгэгчээр “Катодгал” компани шалгарч, энэ сарын 15-наас ажлаа эхлэхээр бэлтгэж буйг Төслийн зохицуулагч ярилаа.
Хүдэр бэлтгэлийн нэгдүгээр шугамын шинэчлэлийн төслийн нэгдсэн төлөвлөлт, зохион байгуулалтыг “Эрдэнэт үйлдвэр” ТӨҮГ-ын Ерөнхий захирлын А/105 тушаалаар байгуулагдсан төслийн баг ханган, явц гүйцэтгэлд захиалагчийн хяналт тавин ажиллаж байна.
Нар минутад мандаж минутад жаргана.
Үс засуулвал: 
Суудал: 
