Эрдэнэт үйлдвэр ХХК-ийн хамт олон Рио-2016 зуны олимпийн ХХХI, паралимпийн ХVнаадамд оролцох Эрдэнэт үйлдвэрийн Хангарьд спорт клубийн тамирчдыг үдэх өнгөрсөн лхагва гаригт үдлээ. Энэ үеэр тамирчиддаа амжилт хүсэхийн зэрэгцээ алд цэнхэр хадаг, Эрдэнэт үйлдвэрийн зэсээр хийсэн аяга, дурсгалын зүйл, Ерөнхий захирлын тушаалаар мөнгөн урамшуулал олгосныг гардуулан өгсөн юм. Хангарьд спорт клубээс Бразилын РиоДе Жанейро хотод болох зуны олимпид Жүдо бөхийн тамирчин ОУХМ О.Ууганбаатар, Б.Тэмүүлэн, чөлөөт бөхөөр Монгол улсын гавьяат тамирчин, ОУХМ Э.Бэхбаяр, Усанд сэлэлтээр ОУХМ Б.Дөлгөөн, Б.Есүй, буудлагаар Хөдөлмөрийн баатар, гавьяат тамирчин, олимпийн мөнгөн медальт О.Гүндэгмаа, ОУХМ Ц.Мөнхзул, паралимпийн байт сурын төрлөөр ЗМЗ-ын ажилтан А.Анхбаяр нар оролцох юм. Эрдэнэт үйлдвэр нийгмийн хариуцлагын хүрээнд их спортыг дэмжин ажилладаг уламжлалтай. Лондонгийн олимпоос Риогийн олимп хүртэл спортын 7 төрлийн 50 гаруй тамирчныг цалинжуулан ажилласан байна. Олимпийн эрх авсан тамирчдад цалин дээр нь урамшуулал олгон, бэлтгэлийн хувцас, спортын хэрэгсэл материалаар хангажээ.
Олимп хөгжлийн санд 91 сая төгрөг хандивлав
Олимпийн хөгжлийг дэмжих сангийн цом Эрдэнэт үйлдвэрт буухиалсан өдрүүдэд үйлдвэрийн ажилтан ажиллагсад 91 сая төгрөг хандивласныг саяхан Олимпийн хөгжлийг дэмжих сангийн удирдлагуудад гардуулан өглөө. Эрдэнэт үйлдвэрийн хамт олон хамгийн их мөнгө хандивлан Монголын тамирчдаа дэмжсэн аж. Энэ үеэр Олимпийн хөгжлийг дэмжих сангийн тэргүүн Монгол улсын гавьяат дасгалжуулагч Ч.Наранбаатар: “Олимпийн хөгжлийг дэмжих аянд 450 гаруй мянган хүн, 260 гаруй байгууллага, хамт олон оролцож, 260 сая төгрөг хандивлалаа. Аяны хүрээнд байгууллага аж ахуйн нэгжүүдээр Олимпийн хөгжлийг дэмжих сангийн цом аялуулан, нийтийн биеийн тамирын үйл ажиллагаа явууллаа. Улс даяар өрнөсөн энэ аяныг Эрдэнэт үйлдвэрийн ажилтнууд манлайлан хамгийн өндөр хандив өргөлөө. Лондонгийн олимп угтаж тамирчдаа дэмжих аянд мөн л Эрдэнэт үйлдвэрийнхэн манлайлж байсан. Үндэсний тамирчдаа чин сэтгэлээсээ дэмждэг, спортод элэгтэй Эрдэнэт үйлдвэрийн хамт олонд тамирчдынхаа нэрийн өмнөөс болон хувиасаа баярласнаа илэрхийлье” гэв. Энэхүү үйл ажиллагаанд үйлдвэрийн бүх цех нэгжийн ажилтнууд идэвхтэй оролцсоноос Авто тээврийн байгууллага, Хүдрийн ил уурхай, Цахилгаан цех тэргүүлсэн байна. Эрдэнэт үйлдвэрийн Спорт ордны захиргаа санаачлан Олимпийн хөгжлийг дэмжих сангаас тус цехүүдийн биеийн тамирын аргазүйч, шилдэг тамирчныг БНХАУ-ын Бээжин хотод аялах эрхийн бичгээр шагнасан байна.
Нар минутад мандаж минутад жаргана.
Үс засуулвал: 
Суудал: 
