Эрдэнэт үйлдвэрийн дэргэдэх “Эрдэнэт” сувиллын цогцолбор үйл ажиллагаагаа өргөжүүлэн, клиникийн бүтэц, зохион байгуулалт, стандарттайгаар эрүүл мэндийн тусламж үйлчилгээ үзүүлж байна. Эрдэнэт клиник болон өргөжиж, шинэ стандарт нэвтрүүлсний ач холбогдол, давуу тал болон цаашид хэрэгжүүлэх зорилтын талаар “Эрдэнэт” сувиллын цогцолборын Эрдэнэт клиникийн тасгийн эрхлэгч, Эмэгтэйчүүдийн их эмч Б.Бурмаатай ярилцлаа.
-Эрдэнэт үйлдвэрийнхээ ажилтнуудын эрүүл мэндийн манаанд 40 гаруй жил зогсож буй “Эрдэнэт” сувилал маань эрүүл мэндийн тусламж үйлчилгээгээ тэлж, клиникийн үйл ажиллагаанд шилжиж байна. Энэ шийдвэр хэзээ гарч, хэрэгжиж эхэлсэн бэ?
-“Эрдэнэт” сувиллын цогцолбор нь үйлдвэрийн нийт ажиллагсад, Үйлдвэрлэлийн осол, мэргэжлээс шалтгаалах өвчлөлийн улмаас хөдөлмөрийн чадвар алдалтын хувь тогтоолгосон групптэй иргэд, ахмадууд тэдгээрийн ар гэрт эрүүл мэндийн тусламж үйлчилгээг үзүүлэх үндсэн үүрэг чиглэлтэй ажилладаг. Бид өмнө нь Сувиллын дэргэдэх Оношилгоо эмчилгээний тасаг гэсэн тасгийн зохион байгуулалттай эрүүл мэндийн тусламж үйлчилгээг үзүүлдэг байсан.
Харин 2019 онд Клиникийн бүтэц үйл ажиллагааны стандарт шинээр гарч, 2023 оны наймдугаар сард оношилгоо, эмчилгээний тасаг маань уг стандартын дагуу магадлан итгэмжлэлийн шалгалтад орж тэнцсэнээр, “Эрдэнэт клиник” нэртэйгээр клиникийн үйл ажиллагаа эрхлэх, магадлан итгэмжлэгдсэн Эрүүл мэндийн байгууллага болж өргөжөөд байна. “Эрдэнэт клиник” одоо Амбулаторийн хэсэг, Яаралтай тусламжийн хэсэг, Орос мэргэжилтэнд тусламж үзүүлэх гэсэн гурван үндсэн хэсгээс бүрдэж байгаа. Эхний хоёр хэсэгт нийт 50 гаруй эмч, сувилагч ажиллаж байгаа бол Орос мэргэжилтэнд тусламж үзүүлэх хэсэг дотроо гурван чиглэлийн албатай ажилладаг.
-“Эрдэнэт клиник”-ийн үндсэн үйл ажиллагаанд гол ямар тусламж үйлчилгээнүүд нэмэгдэж байгаа вэ?
-Юуны түрүүнд манайх эрүүл мэндийн тусламж үйлчилгээг амбулаториор болон өдрийн эмчилгээгээр үзүүлж байна. Мөн нийгмийн эрүүл мэндийн тусламж үйлчилгээгээ өргөжүүлэн үзүүлдэг боллоо. Манай амбулаторид төрөлжсөн мэргэжлийн нийт 12 кабинет бий. Үүнд, зүрх судас, мэдрэл, уушги, элэг цөс, бөөр дотоод шүүрэл, мэс засал, эмэгтэйчүүд, гэмтэл , МШӨ, сэргээн засах, нүд шүд, сувилахуйн найман кабинетаар өдрийн эмчилгээ, бариа засал мэс заслын боолт, гипс, зүрхний цахилгаан бичлэг, яаралтай тусламж ариутгал, Дүрс оношилгооны хоёр кабинетаар ЭХО, Рентген, Эмнэл зүйн лаборатори зэргээр үйлдвэрийн ажилчид, ҮО-МШӨ иргэд, ахмадууд тэдгээрийн ар гэрт эрүүл мэндийн тусламж үйлчилгээ, эмчлэн эрүүлжүүлэлт, хяналт, өдрийн эмчилгээ зэрэг үйлчилгээ үзүүлдэг. Түүнчлэн, манай бүх эмч, сувилагч нар цех хариуцдаг. Нийгмийн эрүүл мэндийн тусламж үйлчилгээ, ажилчдын эрүүл мэндийг дэмжих чиглэлээр цехийн эмчийн зохион байгуулалтаар ажиллаж байна. Үүнд ажилчдын урьдчилан сэргийлэх үзлэг, ажлын байран дах хяналтын үзлэг, идэвхитэй хяналт, сургалт зөвлөмж зэрэг тусламжийг эрүүл мэндийн тэмдэглэлт өдөр, зорилтот аян, төсөл хөтөлбөр зэрэг олон арга хэлбэрээр ажиллагсдадаа хүргэдэг.
-Бусад эрүүл мэндийн байгууллагуудтай харьцуулахад, “Эрдэнэт клиник”-ээр үйлчлүүлэх давуу тал, боломж, онцлог юу байх вэ?
-Иргэд эрүүл мэндийн тусламж үйлчилгээг шатлалын дагуу авдаг. Тухайлбал, эхлээд өрхийн эрүүл мэндийн төвд үзүүлж, шаардлагатай тохиолдолд БОЭТ-ийн нарийн мэргэжлийн эмч нарт өрхийн эмчийн заалтаар үзүүлж тусламж үйлчилгээ авдаг гэх мэт. Тэгвэл Эрдэнэт үйлдвэрийн ажиллагсад, ахмад, МШӨ иргэдийн хувьд шууд үйлдвэрийн дэргэдэх “Эрдэнэт клиник”-ийн нарийн мэргэжлийн эмч нарт үзүүлж, тусламж үйлчилгээг авч байна. Нөгөөтээгүүр, цех хариуцсан нарийн мэргэжлийн эмч, сувилагч нар ажилчдын эрүүл мэндийг хариуцаж ажлын байранд үзлэг хяналт хийж буйгаараа онцлог давуу талтай.
-“Эрдэнэт” сувиллын цогцолбор клиник болон өргөжиж, магадлан итгэмжлэгдсэнээр ямар ач холбогдол өгч байна вэ?
-Үйл ажиллагаанд гарах ахиц, ач холбогдол олон бий. Бид бүтэц үйл ажиллагааны стандарт, илүү тодорхой чиглэлтэй болж байна. Үйлчлэх тусламж үйлчилгээ болон үйлчилгээ үзүүлэх цар хүрээ өргөжсөн. Эрүүл мэндийн тухай хуулинд тухайн эрүүл мэндийн байгууллага магадлан итгэмжлэлд орох эсэх нь сайн дурынх боловч магадлан итгэмжлэгдсэнээрээ ЭМЯ болон ЭМДЕГ-аас барьж байгаа бодлого, шийдвэртэй зэрэгцэн “хөл нийлүүлж” ажиллах, эрүүл мэндийн даатгал төлж буй үйлчлүүлэгч нартаа “Эрдэнэт клиник”-ээрээ дамжуулан хөнгөлөлттэй тусламж үйлчилгээ үзүүлэх нөхцөлийг бүрдүүлж өгөх чухал ач холбогдолтой юм.
-Ойрын үед хэрэгжүүлэхээр ямар зорилт дэвшүүлсэн бэ?
-Бид эмч, сувилагчдаа хүний нөөцийн мэргэжил ур чадварыг дээшлүүлэх сургалтад тасралтгүй хамруулах, Эрүүл мэндийн тусламж үйлчилгээний дэвшилтэт техник, тоног төхөөрөмж суурилуулах, эмчилгээ үйлчилгээний технологи нутагшуулах, ЭМДЕГ-тай гэрээтэй ажиллах, үйлчлүүлэгчдэдээ хөнгөлөлттэй тусламж үйлчилгээ хүргэх нөхцөлийг бүрдүүлэх чиглэлээр онцгой анхааран, зорилт тавин ажиллаж байна.
Нар минутад мандаж минутад жаргана.
Үс засуулвал: 
Суудал: 
