Эрдэнэт үйлдвэр ХХК-ийн удирдлагууд бүтээн байгуулалтын ажилтай танилцлаа

Эрдэнэт Медикал төв ирэх сард нээлтээ хийнэ      Дэлхийн хэмжээний эрүүл мэндийн үйлчилгээг Орхон аймагт төдийгүй улсын хэмжээнд үзүүлэх оношилгоо, эмчилгээний “Эрдэнэт медикал” төв ирэх 12-р сард нээлтээ хийх талаар тус төвийн дарга Ш.Мөнгөнбат үйлдвэрийн удирдлагуудад танилцууллаа. “Эрдэнэт үйлдвэр” ХХК-ийн Ерөнхий захирал Ц.Даваацэрэн, Ерөнхий захирлын Үйлдвэрлэл эрхэлсэн орлогч Д.Даваасамбуу, Ерөнхий захирлын туслах, Тамгын хэлтсийн дарга Н.Баттулга нар өнөөдөр “Эрдэнэт медикал” төв болон Баяжуулах фабрикийн Өөрөө нунтаглах хэсгийн өргөтгөлийн барилгын ажилтай танилцсан. “Эрдэнэт үйлдвэр” ХХК-ийн зөвлөлийн хурлын шийдвэрээр хэрэгжүүлж байгаа Эрүүл мэндийн төсөл нь 3 үе шаттай юм. Оношилгооны төв байгуулахаас гадна тухайн бүсэд эрүүл мэндийн цогцолборын дэд бүтэц бий болж, хэвтэн эмчлүүлэх эмнэлэг, барилга байгууламж баригдана. “Эрдэнэт медикал” төвд рентген болон дижитал рентген аппаратууд, хэт авиа, компьютер томографийн аппарат зэрэг шаардлагатай тоног төхөөрөмжийг суурилуулаад байна. Үйлдвэрийн удирдлагууд тус төвийг ашиглалтанд оруулж, үйл ажиллагааг нь эхлүүлэхэд анхаарч ажиллахыг албаны хүмүүст үүрэг болголоо.   Өөрөө нунтаглах хэсгийн өргөтгөлийн ажил 95 хувьтай байна      “Эрдэнэт” үйлдвэрийн удирдлагууд “Эрдэнэт медикал” төвийн ажлын явцтай танилцсаны дараа Баяжуулах фабрикийн Өөрөө нунтаглах хэсгийн өргөтгөлийн барилгын явцтай танилцаж, холбогдох үүрэг өглөө. Өөрөө нунтаглах хэсгийг өргөтгөснөөр хүдэр боловсруулалт 6 сая тонноор нэмэгдэх юм. Өргөтгөлийн ажил өнгөрсөн оны 5-р сараас эхэлсэн бөгөөд барилга угсралт 90 хувьтай, өргөтгөлийн ажил 95 хувьтай явагдаж байна. Энэ ажлын хүрээнд хацарт бутлуураас гадна олон тоног төхөөрөмжийг Өөрөө нунтаглах хэсэгт суурилуулсан. Шинэ тоног төхөөрөмжүүдийн хүчин чадлыг бүрэн ашиглахын тулд ажиллагсдынхаа ур чадварыг нэмэгдүүлж, мэргэшүүлэхэд анхаарч ажиллаж байгаагаа Баяжуулах фабрикийн дарга Р.Дэлгэр үйлдвэрийн удирдлагуудад хэллээ. Баяжуулах фабрикийн Өөрөө нунтаглах хэсгийн өргөтгөлийг ирэх оны тавдугаар сард ашиглалтанд хүлээн авах юм.