Шүүрлийн усны сувгийн гуравны нэгийг цэвэрлэжээ

Хаягдлын аж ахуйн шүүрлийн усны суваг  цэвэрлэх ажлыг Мон-Энерго компани 6-р сараас эхэлсэн бөгөөд өнөөдрийн байдлаар нийт сувгийн гуравны нэгийг бүрэн цэвэрлэж, 11500 м3 булинга гаргасан байна. Хаягдлын далангаас шүүрч буй усыг цуглуулж авах, үйлдвэрлэлд эргүүлэн ашиглах зориулалттай энэхүү шүүрлийн усны  сувгийг цэвэрлэх ажлыг манай үйлдвэр өөрсдийн хүчээр шийдэх гэж оролдсон ч бүтээгүй байж. Шүүрлийн усны сувгийн урт 1265 м, өргөн нь 40 гаруй м, гүн нь  10 м орчим  бөгөөд булинга, элс, хайрга хуримтлагдсаар сувгийн гүн ердөө  4 метр орчим болсон байж. Мон-Энерго компанийн  инженерүүд энэ сувгийг цэвэрлэхэд зориулан гүүрэн кран бүхий иж бүрэн тоног төхөөрөмж зохион бүтээжээ. “Энэ ажилд нилээд хүндрэл учирч, илүү зардал гарсан ч бид шүүрлийн сувгийг бүрэн цэвэрлэх боломжтой. Хүйтний улирлаас шалтгаалан 10-р сарын 25-наас ажил зогссон. Ирэх оны 4-р сараас ажлаа эхлэн 8-р сард дуусгана” гэж тус компанийн захирал Г.Пүрэвсүрэн ярилаа. Шүүрлийн усны сувгийг цэвэрлэснээр Хаягдлын далангийн бат бэх байдал сайжрах юм. Мөн Хангалын гол руу ус алдахгүй болсноор энэ хавийн бохирдол багасах аж. Нөгөөтэйгүүр энэ сувгийг бүрэн цэвэрлэснээр жилд 5 сая м3  ус хэмнэж, Сэлэнгэ мөрнөөс татах ийм хэмжээний усыг эргүүлэн ашигласнаар манай үйлдвэрт  жилд 3,5-3,8 тэрбум төгрөгийн эдийн засгийн үр ашиг гарах ажээ.