Монголын ашигт малтмал баяжуулагчдын холбооны “Шилдэг гишүүн байгууллага”-аар “Эрдэнэт” үйлдвэрийн хамт олон шалгарлаа. Монгол улсын хэмжээнд 1000 гаруй баяжуулагч инженер байдаг. Тэдний 340 нь тус холбооны гишүүн бөгөөд уул уурхайн 20 гаруй компани Монголын ашигт малтмал баяжуулагчдын холбоотой хамтарч ажилладаг. Тус холбоо 1988 онд “Эрдэнэт” үйлдвэрийн инженерүүдийн санаачилгаар Эрдэнэтэд анх байгуулагдсан түүхтэй. Тус үйлдвэрийн баяжуулах технолог нь шинжлэх ухааны үндэслэлтэй хөгжиж, олон эрдэмтнийг төрүүлсэн юм. Агуулга багатай хүдрийг баяжуулан боловсруулдаг баяжуулалтын шинжлэх ухааны ололтыг Монголд нутагшуулж, хөгжүүлэхэд оруулж буй “Эрдэнэт” үйлдвэрийн уурхайчин хамт олны хувь нэмрийг МАМБХ ийнхүү үнэлэн “Шилдэг гишүүн байгууллага”-аар шалгаруулсан байна.