Хорьдугаар зууны манлай бүтээн байгуулалт Эрдэнэт үйлдвэрийн хөгжлийн 40-өөд жилийн нөр их хөдөлмөрийн ачааны хүндийг үүрэлцэн, тус үйлдвэр эх орон ард түмнийхээ өмнө хүлээсэн үүргээ нэр төртэй биелүүлэхэд бодит хувь нэмэр оруулсаар яваа Эрдэнэт үйлдвэрийн үе үеийн удирдлагууд, инженер техникийн ажилтнууд, ахмадууд, уурхайчин эрчүүддээ Монгол цэргийн өдөр-Зэвсэгт хүчний 95 жилийн ойн баярын халуун мэндийг өргөн дэвшүүлье.
Уулыг нүүлгэх ухааны тэнхээтэй, үе дамжсан уурхайчдын алсын хараа, оновчтой шийдвэр, хөдөлмөр зүтгэлийн үр шимээр Эрдэнэт үйлдвэр амжилт бүтээлээрээ түүчээлэн, улс орныхоо хөгжил дэвшлийн тулгуур багана, баялаг бүтээгч нэгэн том бааз суурь болон өргөжин тэлж буйд бүсгүйчүүд бид үргэлж талархаж явдаг.
Эрдэнэт үйлдвэрийн удирдах болон инженер техникийн ажилтан, нийт уурхайчин эмэгтэйчүүд үеийн үед Та бүхэнтэй мөр зэрэгцэн хөдөлмөрлөж, Эрдэнэт үйлдвэрийн ирээдүйн хөгжлийн төлөө мэдлэг, ур чадвараа дайчлан, оюун ухаанаа уралдууулан хамтдаа урагшилж яваа нь бидний бахархал юм.
Эрчүүдийн цог золбоо, тэвчээр хатуужил, бүтээлч зан чанар монгол айл бүрийн сүлд хийморь, монгол төрийн ноён нуруу байсаар ирсэн, цаашид ч байх болно.
Тэнгэр заяат эрчүүд Та бүхэндээ эрүүл энх, аз жаргал, амжилт бүтээл, сайн сайхан бүхнийг хүсэн ерөөе.
Эрдэнэт үйлдвэр ХХК-ийн удирдагч эмэгтэйчүүдийн “Ариадна” клуб