Эрдэнэт үйлдвэр ХХК-ийн гүйцэтгэх удирдлагын тайлан нээлттэй боллоо

Монгол улсын топ 100 аж ахуй нэгжийн шалгаруулалтыг 13 дахь жилдээ манлайлсан, манай улсын хамгийн том татвар төлөгч,Эрдэнэт үйлдвэр ХХК сүүлийн 3 жилийнхээ үйл ажиллагааны үйлдвэрлэл, санхүү, эдийн засаг, худалдаа, хөгжлийн болон нийгмийн бодлогын хүрээнд хэрэгжүүлсэн ажлын тайлангаа 2016 оны 2 дугаар сар 26-нд олон нийтэд нээлттэй тавилаа. Уурхайчин соёлын ордонд болсон Эрдэнэт үйлдвэр ХХК-ийн гүйцэтгэх удирдлагын 2013-2015 оны үйл ажиллагааны нээлттэй тайлангийн хурлыг Эрдэнэт үйлдвэрийн Ерөнхий захирал Ц.Даваацэрэн нээж үг хэлсэн юм. Тайлангийн хурлын үеэр УСО-ны фоейдод гаргасан “Хямралын эсрэг хамтдаа”,”Түүхээ бичье” сэдэвт үзэсгэлэнг хуран цугласан зочид төлөөлөгчид үзэж сонирхлоо. Эрдэнэт үйлдвэрийн гүйцэтгэх удирдлагын 2013-2015 онд хэрэгжүүлсэн ажлын тайланг орлогч захирлууд видео бичлэг болон илтгэл хэлбэрээр танилцууллаа. Сүүлийн 3 жилд Эрдэнэт үйлдвэр  улсын төвлөрсөн төсөвт 1,1 их наяд төгрөг, нийгмийн даатгалын шимтгэлд 92,5 тэрбум төгрөг, орон нутгийн төсөвт 123 тэрбум төгрөг тус тус төвлөрүүлжээ. 2013-2015 онд дэлхийн зах зээл дээр зэсийн үнэ унаж эдийн засаг, санхүүгийн байдал тогтворгүй болсонтой холбогдуулан хямралын эсрэг авах арга хэмжээний хүрээнд хэмнэлтийн горимд шилжиж, өртөг зардлыг бууруулах, орлогоо нэмэгдүүлэх шат дараалсан арга хэмжээ авч хэрэгжүүлжээ. Үүний үр дүнд Эрдэнэт үйлдвэр нийт 127,9 тэрбум төгрөгийн нэмэлт орлого олж, 131,6 тэрбум төгрөгийн  зардал хэмнэсэн байна. Орхон аймаг,Эрдэнэт үйлдвэрийн хамтын ажиллагааны хүрээнд үйлдвэрлэл-технологи, зам-тээвэр, харилцаа-холбоо, байгаль орчин-экологи, эрүүл мэндийн чиглэлээр нийт 58,6 тэрбум төгрөгийн бүтээн байгуулалтын ажил гүйцэтгэсэн ажээ. Эрдэнэт үйлдвэр 2013-2015 онд ахмад настнуудын тусламж дэмжлэгт зориулан 9,4 тэрбум төгрөг, үйлдвэрлэлийн осол, хурц хордлого, мэргэжлээс шалтгаалах өвчний улмаас хөдөлмөрийн чадвараа алдсан ажилтнуудад эмчилгээ, тусламж, нөхөн төлбөрт 6,3 тэрбум төгрөг, ажилтнуудын буцалтгүй тусламжид зориулж 18,3 тэрбум төгрөг тус тус зарцуулсан байна.  2013-2015 онд Эрдэнэт үйлдвэрийн 1302 өрх айлыг гэр, орон сууцтай болоход нь дэмжлэг үзүүлж нийт 9 тэрбум, 752 сая төгрөгийн тусламж үзүүлснийг тайлангийн хурлаар онцоллоо.

 Г.АЛТАНЦЭЦЭГ
                                                     Т.БАТЧУЛУУН