Эрдэнэт үйлдвэр эрчим хүчний хэмнэлтийн бодлогыг хоёр чиглэлээр хэрэгжүүлсний үр дүнд оны эцэст 3 тэрбум төгрөг хэмнэх төлөв ажиглагдаж байгааг Ерөнхий эрчим зүйч Ш.Төрбат мэдээллээ. Нэгдүгээрт, хэрэглээгээ багасгах чиглэлээр бодит хэмнэлт гаргаж байгаа бол нөгөө нь гурван тарифт тоолуурын хэмнэлтийг ашигладаг ажээ. Өөрөөр хэлбэл эрчим хүч үнэтэй цагаар хэрэглээгээ багасгаж, хямд үеэр хэрэглээгээ ихэсгэх замаар мөнгөн хэмнэлт гаргах нь гурван тарифт хэмнэлт юм. Энэ хэмнэлт цаашид ч үргэлжлэх аж. Харин эрчим хүчний хэмнэлттэй шинэ тоног төхөөрөмж үйлдвэрлэлд нэвтрүүлснээр бодит хэмнэлт гарахаас гадна ажиллагчдын эрчим хүчний хэрэглээний хандлагыг өөрчлөх замаар хэмнэлтийг шийддэг. Оны сүүлээр бодит хэмнэлтийг дүгнэн гаргаж, эрчим хүчний хэрэглээгээ багасгаж чадсан хамт олныг урамшуулдаг. Одоогоор улирлуудын дүгнэлтээс үзэхэд оны төгсгөлд “Эрдэнэт” үйлдвэр эрчим хүчнээс 3 тэрбум төгрөг хэмнэх төлөвтэй байна. Гэсэн ч эрчим хүчний үнийн нэмэгдэл сөрөг нөлөө үзүүлэхийг үгүйсгэхгүй гэж мэргэжлийн хүн тайлбарлалаа.