“Компанийн хөгжилд бидний оролцоо” аян дүнгээ гаргалаа

     Хөгжлийн хэлтсээс зохион байгуулсан “Компанийн хөгжилд бидний оролцоо” аяны дүнгийн хурал, бүтээмж чанарын дугуйлангуудын тэргүүн туршлага түгээх үйл ажиллагаа өнгөрсөн пүрэв гарагт Ерөнхий захиргааны   Оюу танхимд боллоо. Хамт олны бүтээлч санаачилгын үр дүнгээр компанийн үйл ажиллагааг тасралтгүй сайжруулах явцыг идэвхжүүлэхэд чиглэсэн уг аян 8-р сарын 15-наас 12-р сарын 1 хүртэл үргэлжилжээ. Энэхүү аянд 13 цех, нэгжийн 22 бүтээмж чанарын дугуйлан оролцож, материалаа ирүүлсэн байна.   Дугуйлангийн арга барилыг сайжруулах чиглэлээр ахиц гарган, тоног төхөөрөмжийн найдвартай ажиллагаа ашиглалтыг сайжруулах, шинэчлэлийг нэвтрүүлэх, ажил хөнгөвчлөх хэмнэлт гаргах, ажлын байрны эрсдэлийг бууруулах, хаягдал материал дахин боловсруулах, ногоон бүтээмжийг хэрэгжүүлэх замаар компанийн үйл ажиллагааг тасралтгүй сайжруулахад үнэтэй хувь нэмэр оруулан  тэргүүлсэн Баяжуулах фабрикийн Г.Рэнчинсамбуу ахлагчтай “Пресс”, Засвар механикийн заводын О.Батзориг ахлагчтай “Эрхий мэргэн бүтээмж чанарын дугуйлангуудыг дурсамж 400 мянган төгрөгөөр урамшууллаа. Тоног төхөөрөмжийн найдвартай ажиллагааг хангах, ажлын чанарыг дээшлүүлэх, эрчим хүч хэмнэх, ажил хөнгөвчлөх, ажиллах орчин нөхцөлийг сайжруулах, үйлчилгээний чанарыг сайжруулах олон санал санаачилга гаргасан Эрчим хүчний цехийн Г.Эрдэнэбаяр ахлагчтай “Шинэ эргэлт”, Цахилгаан цехийн Д.Мөнхцэцэг ахлагчтай “Амжилт ба дэвшил”, Судалгааны төвийн С.Сүрэн ахлагчтай “Сэтгэмж”, МТХБ-ын А.Загдсүрэн ахлагчтай “Оргил”, Ерөнхий захиргааны Тамгын хэлтсийн Б.Батсүх ахлагчтай “Шидэт зөгий” бүтээмж чанарын дугуйланг дурсамж 300 мянган төгрөгөөр урамшууллаа. Шилдэг дугуйланг шалгаруулахдаа аяны хүрээнд байгаа түвшингээсээ хэр ахисан, тэргүүн туршлагаа түгээсэн байдал, төсөл сайжруулалтын ажлын үр дүн, цаашдын зорилго, төлөвлөгөөг нь харгалзан үзжээ. Шилдэг зохион байгуулагчаар ЗМЗ-ын бүтээмжийн чиглүүлэгч Г.Эрдэнэдаваа, Цахилгаан цехийн бүтээмжийн чиглүүлэгч Б.Ёолк, Ерөнхий захиргааны Тамгын хэлтсийн орлогч дарга О.Отгонбаяр, МТХБ-ын бүтээмжийн чиглүүлэгч А.Мөнх-Эрдэнэ  нар шалгарч  мөнгөн шагнал хүртэв. Шилдэг бүтээмжийн  зөвлөл, хороогоор   Баяжуулах фабрикийн Д.Эрдэнэцогт даргатай, Эрчим хүчний цехийн Г.Батмөнх даргатай бүтээмжийн зөвлөлүүд,  Ерөнхий захиргааны Тамгын хэлтсийн Н.Баттулга даргатай бүтээмжийн хороо шалгарлаа. Энэ үеэр шилдгээр шалгарсан дугуйлангийн ахлагч нар аяны хүрээнд хэрхэн ажилласан тухай болон дугуйлангийн тэргүүн туршлагаасаа хуваалцсан юм.