Чөлөөлөх дайны ялалтын 70 жилийн ой тохиолоо

     Дэлхийн 2-р дайны төгсгөл 1945 оны чөлөөлөх дайны ялалтын 70 жилийн ойн баярын үйл ажиллагаа өнгөрсөн баасан гарагт Эрдэнэт хотноо болов. Энэ  үйл ажиллагаа Аймгийн засаг даргын тамгын газрын хурлын танхимд эхэлсэн. Ёслолын үйл ажиллагаанд чөлөөлөх дайнд оролцож, Монгол орны тусгаар тогтнол   бүрэн эрхт байдлыг батлан хамгаалахын төлөө халуун амь бүлээн цусаа үл хайрлан тэмцэж явсан,  азай буурал 11 ахмад дайчин, Аймгийн Иргэдийн төлөөлөгчдийн хурлын дарга, Засаг дарга, ОХУ-ын Эрдэнэт хот дахь  Ерөнхий консул, Эрдэнэт хотод ажиллаж амьдардаг ОХУ-ын мэргэжилтнүүд оролцлоо. Ёслолын үйл ажиллагааг нээж Аймгийн Иргэдийн төлөөлөгчдийн хурлын дарга Б.Мягмарсүрэн   хэлсэн үгэндээ: “1945 оны чөлөөлөх дайны түүхт  ойг ёслон тэмдэглэж буй нь  Монгол улсын тусгаар тогтнолыг баталгаажуулахад чухал хувь нэмэр оруулсныг бататгах, иргэдийн эх оронч үзлийг төлөвшүүлэх, залуучуудыг ахмад үеийн дайчин уламжлалаар хүмүүжүүлэх, эх орныхоо тусгаар тогтнол, хөгжил дэвшлийн төлөө амь бие үл хайрлан тэмцэж, эрдэм ухаан хөдөлмөр зүтгэлээ зориулсан үе үеийн эх орончдын гавьяат үйлсийг мөнхжүүлсэн чухал үйл ажиллагаа  болж байна” гэж онцлов. Энэ үеэр  ахмад дайчин П.Лувсандорж, Ш.Сүрэнжав, Г.Дугаржав, Р.Дондогжанцан, Ж.Дамба, Д.Дамдинсүрэн, Д.Пүрэвжав, Д.Сандуйжав, Б.Шалмаа, Ж.Донормаа, Р.Нийхүү, Ц.Ролмаа, Ө.Осорхүү, Аймгийн засаг даргын тамгын газрын дарга В.Сумъяасүх, Бэлтгэл хурандаа Д.Рэнцэннацаг, Д.Гомбо, Зэвсэгт хүчний 186-р ангийн захирагч Ө.Эрдэнэ-Очир, Зэвсэгт хүчний 110-р ангийн захирагч Ю.Гансүх, ОХУ-ын Эрдэнэт хот дахь Ерөнхий консул Р.Р.Ракшаев, “Эрдэнэт” үйлдвэрийн Ерөнхий захирлын 1-р орлогчийн туслах  Ю.Г.Холоденко, “Эрдэнэт” үйлдвэрийн мэргэжилтэн В.С Митрофанский, В.Н Макаров, С.И Степанова нар   чөлөөлөх дайны ялалтын 70 жилийн ойн медалиар энгэрээ мялаав. Мөн Аймгийн засаг дарга ахмад дайчин бүрт нэг сая төгрөг, алд цэнхэр хадгийн хамт  гардуулав.   Энэ өдөр Найрамдлын өндөрлөг, Эрдэнэт хотын Улаан-Үдийн гудамж дахь Хүндэтгэлийн хөшөөнд цэцэг өргөх ёслол болж,  Аймгийн Засаг дарга   ахмад дайчдыг хүндэтгэн зоог барилаа.