Өнгөрсөн баасан гарагт Булган аймгийн нутаг “Их залуугийн хөндий”-д Эрдэнэт Булганы нисэх онгоцны буудал байгуулах ажлын хэсэг хуралдлаа. Ажлын хэсгийн энэ удаагийн хуралд Иргэний нисэхийн Ерөнхий газрын Нисэх буудлын удирдах газрын дарга Г.Мөнхболд, Зам тээврийн яамны Агаарын тээврийн бодлого хэрэгжилтийг зохицуулах хэлтсийн дарга С.Мөнхсайхан, Эрдэнэт үйлдвэр ХХК-ний Еранхий захирал Ц.Даваацэрэн, түүний Хөгжлийн асуудал хариуцсан орлогч Б.Намхайнямбуу, Орхон болон Булган аймгийн Засаг дарга тэргүүтэй орон нутгийн удирдлагууд оролцов. Иргэний нисэхийг 2020 он хүртэл хөгжүүлэх бодлогын баримт бичигт жижиг болон өмнө ашиглаж байсан нисэх буудлуудыг сэргээх тухай заалт орсон. “Эрдэнэт” нисэх буудлыг сэргээх судалгааны ажил 2013 оноос эхэлсэн бөгөөд хуучин нисэх буудлыг сэргээх боломжгүй гэсэн дүгнэлт гарчээ. Иймээс шинэ газар сонгон нисэх буудал барихаар төлөвлөж байна. Судалгаагаар Эрдэнэт хотод агаарын тээвэр хөгжих зах зээл байна гэж мэргэжилтнүүд үзжээ. Эхний ээлжинд жижиг онгоц буух буудал барьж, улмаар өргөтгөх аж. Энэ жил техник эдийн засгийн үндэслэл, ажлын зураг төсөл, ерөнхий төлөвлөгөө, төсөл бэлэн болвол ирэх онд барилгын ажил эхэлнэ. Харин шаардлагатай хөрөнгө хаанаас гарах, аль тал нь хариуцах, төслийг хэн боловсруулж хэрэгжүүлэх талаар хэлэлцэх аж. Засгийн газрын 2012-2016 оны үйл ажиллагааны хөтөлбөрийн дагуу агаарын тээврийн салбарыг өмчийн олон хэлбэртэй, чөлөөт өрсөлдөөнтэй болгох бодлогыг үе шаттай хэрэгжүүлэх ажил Эрдэнэтэд ийнхүү эхэллээ.
Г.ЭНХЖАРГАЛ
Нар минутад мандаж минутад жаргана.
Үс засуулвал: 
Суудал: 
