“Эрдэнэт” үйлдвэрийн ажиллагсдын АБК дахь хоолны газар ашиглалтанд ороод 15 жил гаруй болсон учраас барилга нь муудаж, зарим хэсгээрээ мөөгөнцөртөж хүнсний аюулгүй байдал алдагдах, хоолны хордлого гарах эрсдэл өндөр болсон байв. Аймгийн Мэргэжлийн хяналтын газар энэ байдлыг засаж сайжруулахыг удаа дараа анхааруулсны дагуу Эрдэнэт үйлдвэр ХХК-ийн Ерөнхий захирал тушаал гаргаж, хоолны газрын урсгал засварын ажлыг эхлүүлсэн юм.
АБК-н хоолны газрын их засварыг "РСЦ" ХХК гүйцэтгэж, үйлдвэрийн олон цех хэсэг хамтран ажилласан байна. Мөн туслан гүйцэтгэгчээр вакум цонхны үйлдвэр, хөргөлтийн тоног төхөөрөмжийн засварыг Улаанбаатар хотын “Термоцех” ХХК ажилласан байна. Энд дээврээс эхлээд барилгын дотор засвар, цэвэр бохир усны шугам, цахилгаан, агааржуулалтын систем гээд 8 төрлийн засварын ажил хийгджээ. Үйлдвэрийн 2000 гаруй хүн өдөр тутам хооллодог энэхүү хоолны газрын засварыг 40 гаруй хоногийн хугацаанд гүйцэтгэсэн бөгөөд 80-аад хүн 3 ээлжээр ажилласан байна.
Энэ сарын 24-нд АБК-н хоолны газрыг ашиглалтанд хүлээн авах ёслол боллоо. Ёслолын үйл ажиллагаанд Эрдэнэт үйлдвэр ХХК-ийн Ерөнхий захирлын Үйлдвэрлэл эрхэлсэн орлогч Д.Даваасамбуу болон цех хэлтсийн удирдлагууд, аймгийн Мэргэжлийн хяналтын газар, Стандартчилал хэмжил зүйн төвийн ажилтнууд оролцов.
Аймгийн МХГ-ын Улсын байцаагч Б.Буянцогт энд хэлсэн үгэндээ:
- “Эрдэнэт” үйлдвэр ажилчдынхаа хоолны газрын орчин нөхцлийг сайжруулахад ихээхэн хөрөнгө оруулалт хийж, өмнөх байдалтай нь харьцуулахад танигдахааргүй болгож шинэчлэн, хоол үйлдвэрлэлийн үйл ажиллагааны стандарт, хүнсний аюулгүй байдлын шаардлага хангагдах хэмжээний нөхцөл бий болгосонд баяртай байна. Энэ хоолны газарт нийтийн хоол үйлдвэрлэж буй “Хаан хүнс” компани нийтийн хоол үйлдвэрлэлээр олон жилийн туршлагатай хамт олон. “Эрдэнэт” үйлдвэрийн ажилчдын АБК дахь хоолны газрын орчин нөхцөл нь нийтийн хоол үйлдвэрлэлийн олон улсын HACCP систем нэвтрүүлэх бүрэн боломжтой боллоо. Тиймээс ажиллагсдынхаа хоолны газрын эрүүл ахуй, хүнсний аюулгүй байдлыг хангахад дэмжлэг үзүүлж, үүнд тодорхой хэмжээний хөрөнгө зарцуулах шийдвэр гаргасан “Эрдэнэт” үйлдвэрийн удирдлагуудад талархаж байгаагаа илэрхийлье гэв.
"РСЦ" ХХК-ийн гүйцэтгэх захирал Н.Батцэнгэл: -АБК-ийн нийтийн хоолны заалыг шинэчлэн засварлахад үйлдвэрээс нийт 955 сая төгрөг зарцуулж, иж бүрэн засвар хийлээ. Энэ ажлыг гүйцэтгэхэд олон цех хэсэг бидэнтэй хамтран ажилласан гэж ярив.
Ж.ОЮУН
Нар минутад мандаж минутад жаргана.
Үс засуулвал: 
Суудал: 
