Монгол улсын Засгийн газар, Монголын Үндэсний худалдаа аж үйлдвэрийн танхим хамтарч зохион байгуулдаг ТОП-100 аж ахуйн нэгжийг өргөмжлөх үйл ажиллагаа энэ сарын 22-нд Улаанбаатар хотод 14 дэх жилдээ зохион байгуулагдлаа. 2014 оны шилдэг аж ахуйн нэгжүүдийг шалгаруулах энэ үйл ажиллагаанд Монгол улсын Ерөнхий сайд хүрэлцэн ирж ТОП-100 аж ахуйн нэгжүүдийг тэргүүлсэн компаниудын шагналыг гардуулав.
Монгол улсын шилдэг 100 компанийн 2014 оны борлуулалт 17 их наяд төгрөгт хүрчээ. Энэ нь ДНБ-ний 70-80 хувийг эзэлнэ гэсэн харьцуулалт гарсан байна. ТОП-100 аж ахуйн нэгжүүд Монгол улсын төсөвт оруулсан татвар нь 2.5 их наяд төгрөгөөр хэмжигдэж байна. Эдгээр аж ахуйн нэгжүүдэд нийт 50 мянган хүн ажиллаж байгаа гэнэ.
Монгол улсын ТОП-100 компанийг өмнөх жилүүдийн адил “Эрдэнэт” үйлдвэр тэргүүллээ. “М Си Эс” компани хоёрт жагссан байна. “ХААН” банк, “Мобиком” корпораци, Худалдаа хөгжлийн банк, Голомт банк, Хас банк, МАК, НИК компаниуд эхний аравт багтжээ. Татвар төлөлтөөр эхний аравт “Эрдэнэт”, “Оюутолгой”, “М Си Эс”, “Эрдэнэс Тавантолгой”, “АПУ”, НИК, “Мобиком”, “Монгол тамхи”, “Магнай трейд”, төрийн өмчит Цахилгаан дамжуулах үндэсний сүлжээ зэрэг компани оржээ. Харин борлуулалтаараа “Оюутолгой” тэргүүлж, дараа нь “Эрдэнэт” үйлдвэр, “М Си Эс” компани тус тус жагссан байна.
Үндэсний ТОП-100 компанийг тэргүүлсэн шагналыг Эрдэнэт үйлдвэр ХХК-ийн Ерөнхий захирлын хөгжлийн асуудал хариуцсан орлогч Б.Намхайнямбуу гардан авлаа.
Ж.ОЮУН
Нар минутад мандаж минутад жаргана.
Үс засуулвал: 
Суудал: 
