Монголын хамгийн урт унадаг дугуйн зам Эрдэнэтэд ашиглалтанд оров. “Эрдэнэт” үйлдвэрийн “Зөв залуус” клубийн санаачилсан “Эрүүл мэндийн зам” төслийг “Эрдэнэт” үйлдвэрийн удирдлагууд ком-панийн санхүүжилтээр дэмжиж амжилттай хэрэгжүүллээ. Стандартын дагуу баригдсан бетон цутгамал 5,6 км дугуйн зам ийнхүү ашиглалтанд орсноор Эрдэнэчүүд унадаг дугуйгаар хичээллэх, явган аялах, самбарт болон дугуйт тэшүүрээр зорчих боломжтой болж байна. Эрүүл мэндийн замыг зориулалтын дагуу ашиглавал 25-30 жилийн настай гэж мэргэжлийн хүн энэ үеэр мэдээлсэн. Замын нээлтийн ёслолд “Эрдэнэт” үйлдвэрийн Ерөнхий захирлын Нийгмийн асуудал хариуцсан орлогч С.Сувдаа хэлсэн үгэндээ: Энэхүү бүтээн байгуулалтыг Эрүүл мэндэд хүрэх зам гэж онцлон нэрлэе. Цаашид Эрдэнэт хотыг эргэн тойрон бүрхсэн дугуйн замыг аймгийн удирдлагууд үргэлжлүүлэн барихад анхаарна гэдэгт итгэл төгс байна гэв. Нээлтийн үйл ажиллагаанд “Эрдэнэт” үйлдвэрийн Ерөнхий захирлын Үйлдвэрлэл эрхэлсэн орлогч Д.Даваасамбуу, Хөгжлийн асуудал эрхэлсэн орлогч Б.Намхайнямбуу, Орхон аймгийн Засаг дарга Г.Зоригт, ОХУ-аас Эрдэнэтэд суугаа Ерөнхий консул Р.Р.Ракшаев болон үйлдвэрийн цех, нэгжийн удирдлагууд, ажиллагсад оролцсон юм. “Эрдэнэт” үйлдвэрт олон жил үр бүтээлтэй ажиллахын зэрэгцээ өөрийн эрүүл мэнддээ онцгой анхаарч ирсэн Баяжуулах фабрикийн оосорлогч Ц.Баянжав, Хүдрийн ил уурхайн өрмийн машинч А.Дамдиндорж, Авто тээврийн байгууллагын БелАЗ-ын засварчин Т.Гончигсүрэн, Засвар механикийн заводын материал бэлтгэгч Н.Болд нарыг энэ үеэр “Connondal” брэндийн унадаг дугуйгаар урамшуулав.