Чөлөөт бөхийн улсын аварга шалгаруулах тэмцээн маргааш эхэлнэ

      Чөлөөт бөхийн насанд хүрэгчдийн Улсын аварга шалгаруулах тэмцээн Эрдэнэт хотноо гурав дахь удаа зохион байгуулагдана. 1986, 2003 онуудад тус тэмцээнийг Эрдэнэтэд зохион байгуулж байв. Энэ удаагийн улсын аварга шалгаруулах тэмцээн Эрдэнэт үйлдвэрийн 40 жилийн ойн нэрэмжит болж буйгаараа онцлогтой гэж тэмцээний зохион байгуулагчид хэвлэлийн бага хурлын үеэр мэдээллээ. Тус үйлдвэрийн 40 жилийн ой угтсан ажлын хүрээнд зохиогдох томоохон үйл ажиллагаа энэхүү тэмцээнээр эхэлж байгааг мөн тодотгов.  Мэдээллийг Эрдэнэт үйлдвэрийн Спорт ордны захирал, зохион байгуулах комиссын нарийн бичгийн дарга Ш.Даваахүү, Монголын Чөлөөт Бөхийн Холбооны менежер Б.Эрдэнэбаатар, Ерөнхий шүүгч Ю.Батсайхан нар хийж, энэ удаагийн Улсын аварга шалгаруулах тэмцээний онцлог, бэлтгэл ажлын талаар сэтгүүлчдийн асуултанд хариуллаа.
     Эрэгтэйчүүдийн дөч дэх, эмэгтэйчүүдийн арван зургаа дахь удаагийн улсын аварга шалгаруулах тэмцээний үйл ажиллагаанд Чөлөөт Бөхийн Холбооны Ерөнхийлөгч, Уул уурхай, хүнд үйлдвэрийн яамны сайд Д.Сумьяабазар, БСШУЯ-ны Биеийн тамир спортын газрын дарга Л.Чинбат, Олимпийн хорооны дэд ерөнхийлөгч  Ц.Дамдин, Чөлөөт бөхийн дэлхийн хошой аварга, Олимпийн мөнгөн медальт З.Ойдов, Алдар спорт хорооны дарга, Гавьяат тамирчин Г.Өсөхбаяр нарын чөлөөт бөхийн зүтгэлтэн, нэрт тамирчид оролцох аж.  Тэгвэл тэмцээнд Олимпийн хүрэл медальт, дэлхийн хошой аварга С.Батцэцэг, дэлхийн аварга П.Орхон, Олимпийн хүрэл медальт С.Ням-Очир нарын тив дэлхийд алдар нэрээ дуурсгасан чөлөөт бөхийн энэ цаг үеийн нэрт тамирчид  барилдана.  
     Чөлөөт бөхийн улсын аварга шалгаруулах тэмцээнийг олон улсын 20, улсын зэрэглэлтэй хорь гаруй нийт 44 шүүгчийн бүрэлдэхүүнтэй баг дэнслэх юм. Өмнөх улсын аварга шалгаруулах тэмцээн 7 жинд өрсөлддөг байсан бол энэ удаа 10 жинд барилдах болсон байна. Мөн барилдааны формат өөрчлөгдсөн,  шинэ дүрмийн дагуу болох гэж буй анхны тэмцээн юм. Зууны манлай бүтээн байгуулалт Эрдэнэт үйлдвэр, Хангарьд спорт клуб тус тэмцээнийг хамтран зохион байгуулж, Эрдэнэтчүүддээ чөлөөт бөхийн тэмцээнийг төрөлх хотдоо үзэх боломж олгосонд талархаж байгаагаа зохион байгуулах комиссын зүгээс хэвлэлийн бага хурлын үеэр илэрхийллээ. Чөлөөт бөхийн насанд хүрэгчдийн Улсын аварга шалгаруулах тэмцээн энэ сарын 12-ны өдөр Хангарьд паласт эхэлнэ.