“Эрдэнэт” үйлдвэрийн захиргаа, ҮЭ-ийн холбооны 2014-2015 оны Хамтын гэрээний эхний жилийн биелэлтийн явц, өнгөрсөн оны сүүлээр хамтран зохион байгуулсан нэг сарын “Нээлттэй хаалганы өдөрлөг”-өөр ажиллагчдаас гарсан санал шүүмжлэлийн дагуу авч хэрэгжүүлэх ажлын тухай хоёр тал өнгөрсөн лхагва гарагт хэлэлцэв. Энэхүү хэлэлцээрт “Эрдэнэт” үйлдвэрийн Ерөнхий захирал Ц.Даваацэрэн, Нийгмийн асуудал хариуцсан орлогч С.Сувдаа болон ХАБЭА, маркетинг, эдийн засаг, цалин хөлс, хүний нөөц, хуулийн хэлтсийн дарга, мэргэжилтнүүд, ҮЭ-ийн холбооны дарга Н.Батбаатар, тэргүүлэгчдийн хамт оролцон харилцан мэдээлэл хийж бодлогоо тайлбарлан санал солилцлоо. Энэ үеэр Хамтын гэрээний заалт 98,2 хувьтай биелэгдэж байгааг онцлов. Хамтын гэрээний 2.5 буюу “Компанид 20 ба түүнээс дээш жил ажиллаад өндөр насны тэтгэвэр, хөдөлмөрийн чадвар алдалтын хувь тогтоолгож буй ажилтны нэг хүүхдийг мэргэжлийг нь залгамжлуулан ажиллуулах” заалтанд “нарийн мэргэжил” гэсэн өөрчлөлт оруулах үйлдвэрийн захиргааны саналыг Хүний нөөцийн хэлтсийн дарга Ш.Батдэлгэр танилцуулсан. Харин ХИУ-н ҮЭ-ийн хороон дарга П.Баттөр “...амьдралын даатгалын үйлчилгээнд дэмжлэг үзүүлэх” гэсэн 11.16 заалтыг Хамтын гэрээнээс хасах санал гаргасныг Хамтын гэрээний 12.3 заалтыг үндэслэн нөгөө талд бичгээр гаргаж нягтлан судлаад дахин хэлэлцэхээр нээлттэй үлдээв. Хоёр тал хамтран зохион байгуулсан “Нээлттэй хаалганы өдөрлөг”-өөр үйлдвэрийн ажиллагчдаас 800 гаруй санал, хүсэлт, шүүмжлэл гарсныг багцлахад ХАБЭА, ажлын хариуцлага, хүний нөөц, цалин хөлс урамшууллын асуудалд чиглэгджээ. ХАБЭА-н талаарх санал, шүүмжлэлийн 90 орчим хувь нь ажлын хувцас, гутал, хамгаалах хэрэгслийн талаар гомдол байв. Энэ асуудлыг дэлхийн шилдэг уул уурхайн компаниудын жишгээр “Аутсорсинг” төсөл хэрэгжүүлэх замаар шийдвэрлэхэд санал нэгдэв. Эдийн засгийн хямралын үед ч ажиллагчдын хөдөлмөрийн аюулгүй байдлыг бүрэн хангах, амьдрал ахуйг нь сайжруулах, бүтээлч ажил, инновацийг хөхиүлэн дэмжих, ур чадварыг шударгаар үнэлэх, ажлын байрыг найдвартай хадгалахад үйл ажиллагаагаа чиглүүлэн ажиллана гэдэгт талууд санал нэгдэв.
Н.ЭНЭБИШ