Монгол Улсын Зам тээврийн хөгжлийн сайд Д.Ганбат Эрдэнэт үйлдвэрийн Засвар механикийн заводын үйл ажиллагаатай танилцах үеэр тус заводад ачааны вагон үйлдвэрлэх боломж байгаа талаар ярилцжээ.
Импорт орлох бүтээгдэхүүн үйлдвэрлэлийг дэмжих, ажлын байр нэмэгдүүлэх зорилтын хүрээнд “Ачааны загвар вагон угсрах цех”-ийг Зүүнхараагийн вагон депод нээж, монгол инженерүүдийн угсарсан ачааны вагоны түрүүчийг саяхан хүлээн авсан байна. Энэ ажлыг Зам тээврийн хөгжлийн яам, Монголын төмөр зам хувь нийлүүлсэн компани, хувийн хэвшил хамтран анх удаа хэрэгжүүлжээ.
Монгол инженерүүдийн угсарсан ачааны вагон нь урьдчилсан тооцоогоор 72 тонн даацтай, тэвшний эзлэхүүн 88 шоо метр, цагт 120 км хурд авах хүчин чадалтай юм. Импортоор орж ирдэг ОХУ, Хятадын ачааны вагоны насжилт 20-25 жил байдаг бол манайд угсарсан вагон 30-32 жил ашиглана гэдгээрээ чанарын хувьд ялгарч байгаа тухай инженер техникийн ажилчид онцлов.
Манай улс дээрх орнуудаас 79,5-100 мянган ам.долларын өртөгөөр ачааны вагон худалдан авдаг. Тэгвэл манайд угсарч буй тус вагон нь 120 орчим сая төгрөгөөр босчээ.
Харин Ачааны загвар вагон угсрах төслийн хоёр дахь үе шат буюу вагоны эд ангийг дотооддоо үйлдвэрлэх боломж Эрдэнэт үйлдвэрийн Засвар механикийн заводад бий гэсэн дүгнэлтийг салбарын яам, төмөр замын мэргэжлийн байгууллагууд, тус заводын мэргэжилтнүүд гаргав.
Нэг ачааны вагон нийт 130 орчим эд ангиудаас бүрддэг. Техник тоног төхөөрөмжийн шинэчлэл, хөрөнгө оруулалтын асуудлыг шийдсэнээр эдгээр эд ангиудын 90 гаруй хувийг үйлдвэрлэх боломжтой болно гэдгийг Засвар механикийн заводын дарга Б.Баасансүрэн ярив. Эхний ээлжинд заводын инженерүүд 40 гаруй багц эд ангийг авч, зураг төсөл, хийцийн судалгааны ажлыг эхлүүлэхээр болсон байна. Үүний дараа ачааны вагон үйлдвэрлэх төсөл боловсруулан, Зүүнхараагийн депотой хамтран хэрэгжүүлэх нь зүйтэй гэж шийдвэрлэв.
Манай улсад нийт 6000 гаруй ачааны вагон ашигладаг бөгөөд тавь орчим хувь нь ашиглалтын хугацаа хэтэрчээ. Цаашид дахин 10 мянга гаруй ачааны вагоны хэрэгцээ байгаа аж.
Нар минутад мандаж минутад жаргана.
Үс засуулвал: 
Суудал: 
