Эрдэнэт үйлдвэр ХХК-ийн Ерөнхий захирал Х.Бадамсүрэн үйлдвэрлэлийн удирдах ажилтнуудын хамтаар үндсэн цехүүдийн үйл ажиллагаатай танилцаж, шаардлагатай тоног төхөөрөмж болон бусад асуудлыг цаг алдалгүй шийдвэрлэх үүрэг чиглэл өгч байна.
Эрдэнэт үйлдвэрийн үйлдвэрлэлийн тасралтгүй үйл ажиллагаанд техник тоног төхөөрөмжийн найдвартай ажиллагаа чухал байдаг. Иймээс тус үйлдвэр хөгжлийн хөтөлбөр, төлөвлөгөөгөө 1 болон 5-15 жилийн хугацаагаар боловсруулан, үйлдвэрийн технологийн тоног төхөөрөмж, машин, механизмуудыг шат дараатай шинэчлэх үйл ажиллагааг тусган, хэрэгжүүлж байна. Хэдийгээр техникийн шинэчлэл тодорхой үе шаттай хийгдсээр байгаа ч өнөөдрийн байдлаар Ил уурхай, Авто тээврийн байгууллага, Баяжуулах фабрикийн зарим тоног төхөөрөмжийг шинэчлэх, цаг алдалгүй шийдвэрлэх асуудлууд байгааг албаны хүмүүс онцолж байна. Тэгвэл үйлдвэрийн удирдлагууд цехүүдийн үйл ажиллагааг газар дээр нь үзэх, мэргэжилтнүүдийн санал бодлыг сонсох зорилгоор Ил уурхай, Авто тээврийн байгууллага дээр очиж, танилцлаа.
Өнөөдрийн байдлаар Эрдэнэт үйлдвэрийн үндсэн цехийн нэг болох Ил уурхайд зам овоолгын хэсэгт 14 техник хэрэгсэл хөдлөх бүрэлдэхүүн ажилладаг боловч одоо 6 техник ажиллаж байна. Нэг жилд 3-5 белазын шинэчлэл хийхээр төлөвлөдөг ч сүүлийн 3 жилд парк шинэчлэлт удаашралтай байснаас белазууд нэг дор эвдрэх, актлагдахад хүрчээ. Авто тээврийн байгууллагын хувьд 30 белаз ажиллахаас өнөөдөр 28 белаз ажиллаж байна. Мөн Ил уурхайн тэсрэх бодисын үйлдвэрийн ашиглалтын хугацаа нь дуусаж байгаа учир шинээр барих шаардлагатай болсон зэрэг хэд хэдэн асуудлыг Техникийн хэлтсийн дарга онцлов. Ерөнхий захирал Х.Бадамсүрэн эдгээр нэн чухал асуудлыг цаг алдалгүй шийдвэрлэж, ажиллахыг холбогдох хүмүүст үүрэг болгов. Удирдлагууд өнөөдөр Баяжуулах фабрикт очиж, үйл ажиллагаатай нь танилцах юм.
Нар минутад мандаж минутад жаргана.
Үс засуулвал: 
Суудал: 
