Сүүлийн үед олон нийтийн мэдээллийн хэрэгслээр Эрдэнэт үйлдвэр ХХК-тай холбоотой Олон улсын хэрэг маргаан, өр төлбөрийн тухай бодит байдалд нийцэхгүй, янз бүрийн мэдээлэл цацагдах болов. Энэ талаар Эрдэнэт үйлдвэр ХХК-ийн Хууль, эрх зүйн газрын дарга Д.Цэрэнбадамаас тодрууллаа.
Олон улсын Арбитрын шүүхэд Эрдэнэт үйлдвэртэй холбоотой гурван хэрэг маргаан хянагдаж байгаа. Үүнд:
-МRI TRADING AG компанитай холбоотой хэрэг,
-Казахстан улсын Балхашмыс үйлдвэртэй холбоотой хэрэг,
-Ай Си Би Си Стандарт банк плс-тай холбоотой хэрэг зэрэг болно.
Эдгээрээс 2017 оны 2-р сард МRI TRADING AG компанитай холбоотой хэргийг эцэслэн шийдвэрлэсэн.
Энэ хэргийн тухайд бол Лондонгийн Арбитрын шүүхийн 2 удаагийн шийдвэрээр Эрдэнэт үйлдвэрээс 8 сая гаруй ам.доллар гаргуулж МRI TRADING AG компанид олгох шийдвэр гарсан байсан ч тус компанитай олон удаа хэлэлцээр хийж, тохиролцоонд хүрч чадсаны үндсэн дээр төлөх ёстой төлбөрөөс нэг тэрбум гаруй төгрөг хасуулан хэмнэлт хийж дуусгавар болгосон байгаа.
Казахстан улсын Балхашмыс үйлдвэртэй холбоотой хэргийн тухайд бол Эрдэнэт үйлдвэр ХХК нь нэхэмжлэгч тал юм. Балхашмыс үйлдвэрээс 68 сая орчим ам.доллар гаргуулахаар Английн худалдааны Арбитрын шүүхэд маргаан үүсгэн ажиллаж байна. Уг Арбитрын хуралдаан 2017 оны 4-р сарын 26-ны өдөр зарлагдсан.
Харин Ай Си Би Си Стандарт банк плс-тай холбоотой хэргийн тухайд Лондонгийн Арбитрын шүүхийн шийдвэрээр Эрдэнэт үйлдвэр ХХК-иас үндсэн төлбөрийн үүрэгт 51 сая орчим ам.доллар гаргуулж Ай Си Би Си Стандарт банк плс-д олгохоор эцэслэн шийдвэрлэсэн. Мөн нэмж хүү, алданги, зардал зэрэг бусад төлбөрт 43 сая ам.долларыг Эрдэнэт үйлдвэрээс гаргуулахаар тус банк дахин нэхэмжлэл гаргасан асуудлыг хэлэлцэх Арбитрын хурал зарлагдаагүй байна. Эрдэнэт үйлдвэр ХХК-ийн зүгээс Лондонгийн Арбитрын шүүхийн шийдвэрт давж заалдах гомдол гаргасан. Тус хуралдаан 2017 оны 4-р сарын 27-ны өдөр хэлэлцэгдэхээр байна.
Мөн Ай Си Би Си Стандарт банк плс-д Жаст групп ХХК-ийг батлан дааж, баталгаа гаргасантай холбоотой эрүүгийн хэргийг сэргээн шалгуулахаар Прокурорын байгууллага болон АТГ-т гомдол хүсэлт гарган 2017 оны 2 дугаар сараас хэргийг сэргээлгэн ажиллаж байна. Өмнө нь уг асуудалд хохирогч тал тодорхойгүй гэх үндэслэлээр түдгэлзсэн, баримт материал гаргаж өгөх боломжгүй байсан. Одоо хэргийг сэргээн шалгаж байгаа тул холбогдох баримтуудыг бүрэн судлуулж шалгуулах боломжтой.
Нар минутад мандаж минутад жаргана.
Үс засуулвал: 
Суудал: 
