Эрдэнэт үйлдвэр ХХК-ийн Геологи маркшейдерийн хэлтсийн өрөмдлөг хариуцсан тэргүүлэх мэргэжилтэн Д.Түвшинбаяр, Засвар угсралтын цехийн дарга Х.Баяраа нар Антарктид тивд томилолтоор ажиллаад иржээ. Болгар улсын “Антарктид судлах 25-р олон улсын экспедиц”-ийн бүрэлдэхүүнд Эрдэнэт үйлдвэрийн мэргэжилтнүүд орж ажиллаад ирсэн нь түүхэн үйл явдал боллоо. Олон улсын экспедицэд Монголын баг анх удаа ажиллах түүхэн боломжийг бүрдүүлэхэд Эрдэнэт үйлдвэр ХХК эдийн засгийн дэмжлэг үзүүлсэнд талархаж байгаагаа багийн гишүүд ярьж байна.
Тэдний энэ удаагийн томилолтнь Антарктид тивд байрлах Монголын эзэмшил газар нутагт хяналтын цаг уурын станц байрлуулах, Монгол Болгар 2 улсын эзэмшлийн нутгийн зааг дээр кирил үсгэн хөшөө барих, суурийг нь цутгах, мөн Антарктид судлалын хүрээнд өрөмдлөгийн ажил хийх бэлтгэлийг хангах, өөрөөр хэлбэл микро өрөмдлөг хийж гүйцэтгэх зорилготой байсан байна. Багийн бүрэлдэхүүн нь Болгар, Монгол, Турк гурван орны 18 гишүүнтэй явсан бөгөөд томилолтын зорилгоо амжилттай гүйцэтгэжээ. Тус экспедицийн ахлагчаар Болгарын судлаач мэргэжилтэн ажилласан бол Монголчуудын хувьд энэхүү олон улсын багийн бүрэлдэхүүнд ажилласан анхны тохиолдол болсон байна.
Манай улсад Антарктид судлалын үндэс суурь 1972 онд тавигдсан гэж үздэг. Тэр үеийн ЗХУ-ын экспедицийн бүрэлдэхүүнд судлаач Цэрэндэлэг, дараа нь 1982 онд судлаач Чулуунбаатар нар ажиллаж байжээ. Түүнээс хойш 20 шахам жил энэ судалгааны ажил зогсонги байдалтай байсан ч 2008 онд Антарктид судлалын нийгэмлэг Монголд байгуулагдсанаар энэ ажил эрчимжиж, Болгарын нийгэмлэгтэй хамтран ажиллах болсон юм. Үзэгч та бүхэн Антарктидад томилолтоор ажилласан судалгааны багийн гишүүдийн аян замын шинэ сонин дэлгэрэнгүй мэдээллийг “Өнөөгийн Эрдэнэт” сонины ирэх 7 хоногийн дугаараас уншаарай.
Нар минутад мандаж минутад жаргана.
Үс засуулвал: 
Суудал: 
