“БҮТЭЭЛЧ САНААЧЛАГЧ” ЧУУЛГАНЫ ШИЛДЭГ ТӨСЛҮҮД ШАЛГАРЛАА

Эрдэнэт үйлдвэр ХХК-ийн Хөгжлийн хэлтсийн Инновацийн төвөөс зохион байгуулсан сайн саналын системийн манлайлагчдын “Бүтээлч санаачлагч” чуулганы сүүлийн буюу 3-р шатны хэлэлцүүлэг өнөөдөр болж, шилдэг 10 төслийг шалгаруулсан байна. Сайн саналын 100 манлайлагчдын “Бүтээлч санаачлагч” чуулган үндсэн 2 зорилгыг дэвшүүлж, 3 үе шаттайгаар болж өндөрлөв. Саналын системд идэвхтэй оролцдог, хамгийн олон сайн санал гаргаж хэрэгжүүлдэг манлайлагчдыг компанийн ажиллагсдад таниулан сурталчлах, нийт хамт олны саналын систем дэх оролцоог нэмэгдүүлэхэд эхний зорилго нь  чиглэгджээ.  Эдгээр  идэвхтэй хэсгийн оролцоонд  тулгуурлан компанийн үйл ажиллагаа болон процесст тулгарч байгаа бэрхшээлүүдийг  багасгах чиглэлээр төслийн сайн  санаануудыг дэвшүүлж, хэлэлцүүлсэн нь чуулганы нэг зорилго, үр дүн боллоо.

“Бүтээлч санаачлагч” чуулганы 3-р шатанд эхний үе шатнаас шалгарсан 20 төслийг багууд танилцуулан хэлэлцүүлэв. Хөгжлийн хэлтсийн Инновацийн төв, цехүүдийн ерөнхий мэргэжилтнүүдээс бүрдсэн ажлын хэсэг эдгээр төслийн саналаас 10 төслийг тодорхой үзүүлэлтүүдийг үндэслэн шалгаруулсан. Үүнд, ЗМЗ-ын Б.Баянжаргалын санаачилсан “ГЦ1400 гидроциклоны резинийг шатаахгүйгээр зорж авах”, Баяжуулах үйлдвэрийн Л.Батбаярын санаачилсан  “Гагнуурын аппарат дээр цагийн механизм тавих”, Ил уурхайн Ганжаргалын санаачилсан “Дугуйт түрэгч дээр шон зөөх төхөөрөмж суурилуулах”, Чанар хяналтын хэлтсийн  Ц.Энхтөрийн санаачилсан “Эвдэрч ашиглагдахгүй болсон шатаах зуухнуудын их биеийг ашиглан шинэ зуух хийх”, Тээвэр ложистикийн албаны Д.Гантулгын санаачилсан  “Ашигтай талбайг нэмэгдүүлэх, зөөврийн рамп байрлуулах”, мөн албаны Х.Ганбатын санаачилсан “Явган хүний зам хийх”, Баяжуулах үйлдвэрийн Б.Оюунболдын санаачилсан “Гагнуурын трансформаторын удирдлагын хэлхээг автоматжуулж эрчим хүчний хэмнэлт гаргах”, ЭХЦ-ийн Ж.Мөнхбаатарын санаачилсан ЦН-3000/197 насосны хамгаалах втулкийг зэвэрдэггүй материалаар хийх”, Үйлчилгээ аж ахуйн албаны Н.Алтанцэцэгийн санаачилсан “Ашиглагдахгүй байгаа хүлэмжийг ашиглан мод үржүүлгийн газар бий болгох”, мөн албаны Б.Баасандоржийн санаачилсан “Хими цэвэрлэгээний бодисыг конденсацийн аргаар уурнаас шингэн төлөвт шилжүүлэх төхөөрөмж” саналууд  шалгарч,  эдгээрийг Инновацийн төвөөс санхүүжүүлэх боломжтой гэж үзжээ.