Орхон аймагт үйл ажиллагаа явуулж байгаа, үндэсний аюулгүй байдлыг хангахад тусгайлсан чиг үүрэг бүхий байгууллагуудын дунд аймгийн Засаг даргын нэрэмжит “Марш-тактик”-ийн цогцолбор тэмцээн энэ сарын 14-ний өдөр зохиогдлоо. Монгол цэргийн өдөр, Зэвсэгт хүчний 98 жилийн ой, Халх голын 1939 оны байлдааны ялалтын 80 жилийн ойн арга хэмжээний хүрээнд зохиогдсон тус тэмцээнд хүчний зургаан байгууллагын, 12 тасгийн, 160 гаруй тамирчид оролцож, шилдгүүдээ тодруулсан юм.
Хүчний байгууллагуудад алба хааж байгаа залуучуудын сэтгэлзүйн болон бие бялдарын бэлтгэлийг сайжруулах, тэсвэр хатуужил олгох, мэргэжлийн ур чадварыг дээшлүүлэх, байгууллага хоорондын туршлага солилцох зэрэг олон талын ач холбогдолтой “Марш-тактик” нь жил бүр цогцолбор тэмцээн хэлбэрээр зохиогдож иржээ. Үүнд, хувцасны үзлэг, гранат шидэлт, гир өргөх, 10 км зайд гүйх явцдаа буудлага, саадтай зурвасаар нэвтрэх, шархадсан хүнийг хөнөөлийн голомтоос зайлуулах, буу болон хөнөөх зэвсгээс хамгаалах, норматив гүйцэтгэх зэрэг найман төрөлт тэмцээн хамаардаг байна. Өдрийн турш үргэлжилсэн тэмцээний нийлбэр дүнгээр 186 дугаар ангийн ахлах ахлагч А.Болдбаяр захирагчтай тасаг тэргүүн байр эзэлж, аймгийн Онцгой байдлын газрын Онцгой байдлын ахлах ахлагч Г.Энхтөр захирагчтай тасаг, 186 дугаар ангийн ахлах дэслэгч Л.Эрдэнэбилэг захирагчтай тасаг тус тус удааллаа.
И.ЧИНТОГТОХ
Нар минутад мандаж минутад жаргана.
Үс засуулвал: 
Суудал: 
