“Эрдэнэт үйлдвэр” ТӨҮГ-ын үйлдвэрлэлийн үйл ажиллагаа өнөөдрийг хүртэл тасралтгүй хэвийн үргэлжилж, улс орныхоо эдийн засаг, ард иргэдийн амьдралд хувь нэмрээ оруулсаар байгаа нь цар тахлын эсрэг авч хэрэгжүүлж буй ажлын үр дүн юм. Сүүлийн үед халдвар хамгаалал, оношилгооны ямар арга хэрэгсэл ашиглаж Ковидоос сэргийлж буй талаар Шуурхай штабын дарга Д.Мөнхболдоос тодрууллаа.
- Шуурхай штаб саяхан хуралдлаа. Ямар асуудал хэлэлцсэн бэ?
-Энэ долоо хоногийн эхэнд Шуурхай штаб хуралдсан. Бид нөхцөл байдалд дүн шинжилгээ хийж, цаашид авч хэрэгжүүлэх арга хэмжээний талаар болон бүтэн сарын хугацаанд нэвтрүүлсэн шүлсний оношилгооны тестийн үр дүнг хэлэлцлээ. Бид 33 хоногийн хугацаанд өдөр бүр 3000 орчим хүнээс шүлсний оношилгооны тест авч ажилд нь гаргасан. Үүний тулд шүлсний 100 мянган тест ашиглаж, эерэг гарсан 397 тохиолдлоос 107 нь батлагдсан. Нэг тохиолдлын ард хамгийн багадаа 3-5 ажилтан халдвар авна гэж үзвэл 500 хүн халдвар авах эрсдэлээс хамгаалж чадсан байна. Мөн цар тахлын халдварыг 50 хувь бууруулсан. Энэ бол маш сайн үр дүн. Гэсэн ч бид халдвар хамгааллын дэглэм, сэрэмжээ хэрхэвч алдаж болохгүй. Өнгөрсөн тав, зургаадугаар сард коронавирусын идэвхжил, давлагаа явсан. Одоо улсын хэмжээнд коронавируын дельта хувилбар тархаж байна.
-Орхон аймагт дельта хувилбарын вирусын халдвар илэрсэн үү?
-Аймгийн Эрүүл мэндийн газар судалж байгаа. Дүгнэлт хараахан гараагүй. Жишээ дурдахад, Ховд аймагт хийсэн судалгаагаар тус аймагт илэрсэн нийт халдварын 50 хувь нь дельта вирус байна гэсэн мэдээлэл гарсан. Тийм учраас ажилтнууд сэрэмжтэй байж, халдвар хамгааллын дэглэмээ сайн мөрдөх хэрэгтэй.
-Коронавирусын альфа, дельта хувилбарын ялгааг энгийн үгээр тайлбарлавал..?
-Коронавирус өөрөө сэртэнтэй. Альфа болохоор эхлээд тэр сэртэн дээр наалддаг юм байна. Тэндээсээ дотогш орж дархлааны эсийг гэмтээдэг. Тиймээс хэсэг хугацааны дараа, 6 дахь хоног дээрээ, зарим нь 13 дахь хоног дээрээ илрээд байгаа юм. Харин дельта вирус болохоор сэртэн дээр тогтохгүй шууд дотогш нэвтэрдэг онцлогтой. Өөрөөр хэлбэл хоёр хоногийн дотор шинж тэмдэг мэдрэгдэж, хатгаа хэлбэрээр илэрнэ гэсэн үг. Толгой, хоолой өвдөх, дотор муухайрах, зарим хүмүүст халуурах гэсэн хэдхэн шинж тэмдгээр илэрнэ. Өмнө нь бид тандалт судалгааг хийхдээ хөдөө орон нутаг зорчсон уу, Улаанбаатар явсан уу, хамаатан садан, ах дүү тань гэр оронд чинь ирдэг байсан уу, гэж авдаг байсан. Одоо бол шууд шинж тэмдгийн тандалт хийдэг болсон. Энэ нь цаг хожих сайн талтай. Мөн өмнө нь 40 гаруй хүн гаргаад автобусанд халуун үздэг байсан бол одоо асуумж бөглүүлж байгаа нь илүү үр дүнтэй байх жишээтэй. Энэ мэтчилэн цар тахалтай тэмцэх аргаа нөхцөл байдалтайгаа уялдуулан өөрчлөн ажиллаж байна.
-Вакцины үр дүнгийн талаар..?
-Эрдэнэт үйлдвэр бүх ажилтнаа вакцинжуулсан нь халдварыг газар авхуулахгүй байхад нөлөөлсөн. Халдвар авсан ажилтнуудын маань биеийн байдал хөнгөн, бага зэрэг халуурах, бие арзайх шинж тэмдэгтэй өвчлөөд эдгэж байна. Эрдэнэт үйлдвэрээс нийт 935 батлагдсан тохиолдол илэрч, 845 хүн эмчлүүлж эдгээд байна.
-Хэрэв шинэ төрлийн дельта вирусийн тархалт нэмэгдвэл манайх бэлэн үү?
-Материаллаг байдлын хувьд хангалттай. “Эрдэнэт” сувиллын цогцолборын байраа бэлдээд аймгийн хэрэгцээнд өгсөн. Витамины хангалт, сургалт хийсэн. Одоо ажилтнуудынхаа сэтгэл зүйтэй ажиллах хэрэгтэй байгаа. Ковид туссан хүний сэтгэл зүй, ажилдаа орох үеийн сэтгэл зүй, хамтран ажилладаг хамт олны сэтгэл зүйн бэлтгэл маш чухал. Нэг үеийг бодоход сэтгэл зүйн хувьд бид хүнд үеэ даван туулсан. Одоо дархлаагаа дэмжээд, бие, сэтгэлийн хүчтэй, халдвар хамгааллын дэглэмээ дадал болгоод ажиллахад ногоон бүс рүү шилжиж амгалан тайван, энх тунх амьдрах сайхан цаг ойрхон гэж итгэж байна.
-Баярлалаа.
М.Одгэрэл
Фото: Б.Баттөгс
Нар минутад мандаж минутад жаргана.
Үс засуулвал: 
Суудал: 
