Эрдэнэт хотын өдрийг тэмдэглэн өнгөрүүлэх асуудлыг 2015 онд аймгийн ИТХ-ын тогтоолоор шийдвэрлэсэн бөгөөд 2017 оны 10 дугаар сард хуралдсан аймгийн Иргэдийн Төлөөлөгчдийн Хурлаар жил бүрийн 12 дугаар сарын 11-ний өдөр тэмдэглэж байхаар шинэчлэн баталгаажуулсан юм. Мөн Илгээлтийн эзэд, анхдагчдын саналыг үндэслэн аймгийн ИТХ-ын Тэргүүлэгчдийн 2019 оны 7-р сарын 25-ны өдрийн 76-р тогтоолоор Анхдагч илгээлтийн эздийн өдрийг 12-р сарын 11-нд Эрдэнэт хотын өдөртэй хамтатган тэмдэглэж байхаар шийдвэрлэсэн билээ. Эрдэнэт хотын болон Анхдагчид илгээлтийн эздийн өдөр бол Орхончууд, Эрдэнэтчүүд бид 40 гаруй жилийн түүхийн ололт амжилт, алдаа оноогоо дүгнэх, ахмадуудаа алдаршуулах, ирээдүйд хийх ажлаа төлөвлөх, хүүхэд, залуучууддаа болон олон нийтэд Эрдэнэт хотынхоо үүх түүх, үнэт зүйлээ сурталчилах, Эрдэнэт хотоороо бахархах баярын өдөр юм. Хэдхэн хоногийн өмнө болсон аймгийн Иргэдийн Төлөөлөгчдийн Хурлын ээлжит 15 дугаар хуралдаанаар 2019 оны ажлын дүнгээ хэлэлцүүлэн Засаг даргын Үйл ажиллагааны хөтөлбөрийн биелэлт “Хангалттай” гэсэн үнэлгээ авлаа. 2019 онд аймгийн эдийн засаг, нийгмийг хөгжүүлэх үндсэн чиглэлийн биелэлт 90.8 хувьтай, аймгийн Засаг даргын 4 жилийн хугацаанд хэрэгжүүлэх Үйл ажиллагааны хөтөлбөрийн биелэлт 95.3 хувьтай гарч байна. Саяхан УИХ-аас Монгол Улсын Үндсэн хуулинд нэмэлт өөрчлөлт оруулж баталснаар Эрдэнэтчүүд та бидний 1994 оноос хойш 25 жилийн турш ярьж саналаа гаргаж байсан Эрдэнэт хотын статусын асуудал нааштайгаар шийдвэрлэгдэх эрхзүйн үндэс бүрдэж байгааг та бүхэнд дуулгахад таатай байна.
Баялаг он цагийн түүчээнд бахархах түүхээ бүтээж ирсэн зууны манлай бүтээн байгуулалтын эзэд анхдагчид, барилгачид, уурхайчид, ахмадууд, нийт иргэдээ Эрдэнэт хотын өдрийн баярын мэнд дэвшүүлье!
Орхон аймгийн Засаг дарга бөгөөд Эрдэнэт хотын захирагч Дамбын БАТЛУТ
2019-12-11
Нар минутад мандаж минутад жаргана.
Үс засуулвал: 
Суудал: 
