Эрдэнэт үйлдвэрийн Ус хангамжийн цехийн хамт олон, “Сайн туршлага нэвтрүүлэх” уралдаанд тэргүүн байр эзэлжээ. Усны зохицуулах хорооноос 2025-2026 оныг “Сайн туршлага нэвтрүүлэх жил” болгон зарлаж, Монгол улсын хэмжээнд Ус хангамж ариутгах татуургын үйл ажиллагаа эрхлэх тусгай зөвшөөрөл эзэмшигч нийт байгууллагуудын дунд усны зүй зохистой хэрэглээ, салбарын хүний нөөцийн хөгжил, үйл ажиллагаандаа хэрэгжүүлж буй сайн туршлагуудаа сурталчлах, шилдэг сайн туршлагууд хэрэгжүүлэх зэрэг үзүүлэлтээр шилдгийг тодруулсан байна.
Тус уралдаанд “Эрдэнэт үйлдвэр” ТӨҮГ-ын усны зүй зохистой хэрэглээ, усны дахин буюу эргүүлэн ашиглалт, Ус хангамжийн цехийн хэрэгжүүлж буй сайн туршлагууд өндөр үнэлэлт авчээ. Мөн тус үйлдвэрийн хэмжээнд хэрэгждэг Хүний нөөцийн менежментийн тогтолцооны ISO:30400 багц стандартын үр дүнг жишиг сайн туршлагаар тодруулж, Ус хангамж ариутгах татуургын тусгай зөвшөөрөл эзэмшигч орон нутгийн байгууллагууд, Усны зохицуулах хорооны мэргэжилтнүүдийн төлөөллийг Эрдэнэт үйлдвэртэй танилцаж, туршлага судлах уулзалт зохион байгуулсан байна.
Энэ үеэр Эрдэнэт үйлдвэрийн Хүний нөөц, захиргааны хэлтсийн дарга О.Отгонбаяр үйлдвэрийн хэмжээнд хэрэгжүүлж буй Хүний нөөцийн менежментийн тогтолцооны ISO:30400 стандартын хэрэгжилтийн талаар танилцуулж, арга туршлага, заавар зөвлөмжөө хуваалцав.
Ус хангамжийн цех, үйлдвэрийн газрын Баяжуулах үйлдвэр, Дулааны цахилгаан станцыг технологийн хэрэгцээт техникийн болон эргэлтийн усаар хангахаас гадна Усны Зохицуулах хорооноос олгодог үйл ажиллагааны Тусгай зөвшөөрлийн хүрээнд Орхон аймаг Эрдэнэт хотын хүн ам, хэрэглэгчдийг ундны цэвэр усаар ханган ажилладаг.
Усны Зохицуулах хорооноос олгодог Тусгай зөвшөөрөл нь Хүн ам, аж ахуйн нэгж, хэрэглэгчдийг цэвэр усаар хангаж бохир усыг татан цэвэрлэж зайлуулах үйл ажиллагаа эрхлэх тусгай зөвшөөрөл бөгөөд тусгай зөвшөөрлийг 3-5 жилийн хугацаатай тухайн байгууллагын ажлын үнэлгээнд тулгуурлан олгож, сунгадаг байна. Энэ онд тус цехийн тусгай зөвшөөрлийн хугацаа дуусаж байгаатай холбогдуулан үйл ажиллагаа, хууль тогтоомжийн хэрэгжилтээ хамгаалан, өндөр үнэлгээ авснаар 5 жилийн хугацаатайгаар Тусгай зөвшөөрлөө сунгуулсан гэж Ус хангамжийн цехийн дарга Б.Баянбат онцлов.
Тус цех Ус хангамж ариутгах татуургын үйл ажиллагааны холбогдох хууль, тогтоомж, эрх зүйг хэрэгжүүлж, Усны зохицуулах хороо, Засгийн газрын хэрэгжүүлэгч агентлаг Усны газраас өгсөн үүрэг даалгавар,чиглэлийг биелүүлэн ажиллаж байна.
Нар минутад мандаж минутад жаргана.
Үс засуулвал: 
Суудал: 
