Баяжуулах үйлдвэр 2026 онд шинээр бий болгосон Мэдлэг түгээх долоон ажлын байрыг өнөөдөр зэрэг нээлээ. Ингэснээр тус цех нийт Мэдлэг түгээх 20 ажлын байртай болж байна.
Шинээр байгуулагдсан Мэдлэг түгээх ажлын байруудын нээлтийн үйл ажиллагаа тус цехийн Мэдээлэл, хөгжлийн танхимд болж, “Эрдэнэт үйлдвэр” ТӨҮГ-ын Мэдлэгийн менежментийн стандартын Сайжруулалтын ажлын хэсгийн гишүүд, Баяжуулах үйлдвэрийн удирдлага, товчоо, хэсгийн дарга нар болон хэсгүүдийн Мэдлэг түгээх ажлын байр хариуцагчид оролцлоо.
Энэ үеэр бүтцийн нэгжүүд шинээр бий болгосон “Мэдлэг түгээх ажлын байр”-ны зорилго, тохижилт, хэрэгжүүлж буй шинэ санаа, шийдэл, цаашдын үр өгөөж, ач холбогдлын талаар танилцуулсан юм.
Тухайлбал, Нунтаглах баяжуулах хэсэг тоног төхөөрөмжийн засварчдад зориулсан “Ган түлхүүр”, Дулаан агааржуулалтын хэсэг “Шинэ мэдлэг, шинэлэг бүтээл, хөгжүүлэлтийн өрөө”, Өргөн тээвэрлэх машин, механизмын хэсэг “Краны цахилгаан автоматжуулалт”, Механик боловсруулалт, бигнүүрийн хэсэг “Хийн тоног төхөөрөмжийн ашиглалтын засварчдын өрөө”, Бутлан тээвэрлэх хэсэг “Том бутлалтын технологийн мэдлэг түгээх ажлын байр”, Өөрөө нунтаглах хэсэг “Үйлдвэрлэл, технологийн сургалт, хөгжлийн танхим”, Хүний нөөцийн товчоо “Мэдлэгийн интерактив төв”-ийг тус тус байгуулжээ.
“Эдгээр ажлын байр нь үйл ажиллагаанд хуримтлагдсан мэдлэг, сайн туршлага, технологийн болон мэргэжлийн мэдээллийг системтэйгээр цуглуулах, хадгалах, харилцан суралцах замаар ажилтнуудын мэдлэг, ур чадварыг хөгжүүлэх, хүний хөгжил, аюулгүй ажиллагааг эрхэмлэн, үйлдвэрлэлийн үр ашгийг нэмэгдүүлэх, тогтвортой үйл ажиллагааг хангахад чиглэж байна” гэж Баяжуулах үйлдвэрийн Хүний нөөцийн товчооны дарга Т.Тунгалагтамир ярилаа.
“Эрдэнэт үйлдвэр” ТӨҮГ хүний нөөцийн менежментийн тогтолцоондоо ISO 30400 багц стандартыг нэвтрүүлж, баталгаажуулсан бөгөөд тус багцад Мэдлэгийн менежментийн MNS ISO 30401:2021 стандарт багтдаг. Энэ хүрээнд үйлдвэрийн хэмжээнд “Мэдлэг түгээх ажлын байр” төслийг хэрэгжүүлж эхэлсэн.
Өдгөө 48 жилийн түүхтэй Эрдэнэт үйлдвэр улс орны нийгэм, эдийн засгийн хөгжилд жинтэй хувь нэмэр оруулахын зэрэгцээ үйлдвэрлэл, технологи, мэргэжлийн мэдлэгийн арвин нөөцтэй уурхай болон хөгжиж ирсэн. Энэхүү хуримтлагдсан мэдлэг, туршлагыг байгууллагын оюуны хөрөнгө болгон хадгалж, ажилтнуудад түгээн өвлүүлж, тэднийг хөгжүүлэхэд “Мэдлэг түгээх ажлын байр” төслийн гол зорилго оршиж байгаа юм. Ийнхүү, баяжуулагчид мэдлэг, туршлагаа түгээн дэлгэрүүлэх 20 орчныг бий болгож, мэдлэгийг байгууллагын оюуны хөрөнгө болгон хөгжүүлэх шинэ соёлыг төлөвшүүлсээр байна.
Нар минутад мандаж минутад жаргана.
Үс засуулвал: 
Суудал: 
