“Mining Week & MinePro 2026” олон улсын уул уурхайн чуулган, үзэсгэлэнгийн үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон “Монгол Улс, Оросын Холбооны Улсын хамтын ажиллагаа: Стратегийн хамтын ажиллагааны хамгийн тод бэлгэ тэмдэг - Эрдэнэт үйлдвэр” сэдвээр орос хэлээр илтгэл танилцууллаа.
Монголын уул уурхайн салбарын олон улсын хамтын ажиллагаа, хэлэлцүүлгийн чухал талбар болсон “Mining Week” үйл ажиллагааг Ерөнхий захирал Уул уурхай, хүнд үйлдвэрийн сайдаар ажиллаж байхдаа санаачлан эхлүүлж байсан. Өнөөдөр уг үйл ажиллагаа олон улсын уул уурхайн салбарын төлөөлөл оролцдог өргөн хүрээний чуулган, үзэсгэлэн болон өргөжжээ.
“Эрдэнэт үйлдвэр” ТӨҮГ-ын Ерөнхий захирал Г.Ёндон илтгэлдээ, Эрдэнэт үйлдвэрийг Монгол, Оросын олон жилийн хамтын ажиллагаа, харилцан итгэлцэл, хамтын бүтээн байгуулалтын бодит үр дүн хэмээн тодорхойлж, үйлдвэрийн түүхэн замнал, өнөөгийн хөгжил болон цаашдын хамтын ажиллагааны талаар танилцуулсан юм.
Эрдэнэт үйлдвэр үүсэн байгуулагдсан цагаасаа эхлэн хоёр орны мэргэжилтэн, инженер, ажилчдын хамтын хөдөлмөрөөр хөгжиж, уул уурхайн үйлдвэрээс гадна хот, дэд бүтэц, боловсрол, эрүүл мэнд, соёлын бүтээн байгуулалтыг дагуулсан цогц хөгжил болсон. Өнөөдөр энэ түүхэн өв, мэдлэг, туршлага Монголын шинэ үеийн инженер, техникийн ажилтнуудад өвлөгдөн, үйлдвэрийн хөгжлийн суурь болж байна.
Мөн Эрдэнэт үйлдвэрийн сүүлийн жилүүдийн хөгжлийн үр дүнг онцолж, үйлдвэрлэлийн хүчин чадал, техник технологи, тоног төхөөрөмжийн шинэчлэл, дижитал шилжилтийг үе шаттай хэрэгжүүлж буй талаар мэдээлэв. Үүний зэрэгцээ геологи хайгуул, хүний нөөц, шинжлэх ухаан, боловсролын чиглэлээр хамтын ажиллагааг өргөжүүлж, ирээдүйн мэргэжилтнүүдийг бэлтгэхэд ОХУ-ын их, дээд сургууль, судалгааны байгууллагуудтай хамтран ажиллаж байгааг илтгэлдээ дурдсан.
Эрдэнэт үйлдвэрийн цаашдын хөгжлийн зорилт нь зөвхөн үйлдвэрлэлийн өсөлтөөр хязгаарлагдахгүй бөгөөд шинэ технологи, инновац, шинжлэх ухаан, боловсрол, аж үйлдвэрийн хамтын ажиллагааг өргөжүүлэхэд чиглэж байгааг Ерөнхий захирал Г.Ёндон хэлж байлаа. Илтгэлийн төгсгөлд тэрээр, Монгол, Орос хоёр орны олон жилийн хамтын ажиллагааг шинэ үеийн технологи, мэдлэг, инновацын чиглэлээр улам бэхжүүлэх боломжтойг онцоллоо.
Нар минутад мандаж минутад жаргана.
Үс засуулвал: 
Суудал: 
