“Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөн өнөөдөр боллоо. Зөвлөгөөнийг үйлдвэрийн газрын Ерөнхий инженер Т.Батмөнх удирдан явуулж, бүтцийн нэгжийн удирдлагууд цаг үеийн асуудлаар мэдээлэл хийсэн. Өнгөрсөн долоо хоногт хөдөлмөрийн аюулгүй байдал, эрүүл ахуйн чиглэлээр хэвийн ажиллаж, нийт ажилтны сургалт зохион байгуулагдаж эхэлсэн талаарх мэдээллээр зөвлөгөөн эхэллээ. Долоо хоног бүрийн лхагва, пүрэв гарагт зохион байгуулагдаж буй тус сургалтад цех, нэгжүүд ажилтнуудаа хамруулахыг ХАБЭАХ-ээс санууллаа.
Үйлдвэрлэл, техникийн хэлтсийн Үйлдвэрлэлийн албаны дарга А.Машбаяр өнгөрсөн шуурхай зөвлөгөөнөөс өгсөн үүрэг, даалгаврын биелэлт танилцуулж, технологийн нормчлогдсон материалын нийлүүлэлт хэвийн байгааг хэллээ. Уурхайчид наймдугаар сарын эхний 23 хоногийн байдлаар үйлдвэрлэлийн төлөвлөгөөгөө давуулан биелүүлж байна. Эрдэнэт үйлдвэрийн үйлдвэрлэлийн цехүүдэд бүтээн байгуулалт, хөрөнгө оруулалтын ажлууд хуваарийн дагуу үргэлжилж, бүтцийн нэгжүүд намар, өвлийн бэлтгэлээ хангаж байна. Үйлдвэрийн газрын хэмжээнд өвөлжилтийн бэлтгэлд нийт 295 ажил төлөвлөснөөс 20 ажил 100 хувийн биелэлттэй, нийт ажил 18.8 хувийн биелэлттэй явна. Ажилтнууд эрүүл мэндийн урьдчилан сэргийлэх үзлэгт хуваарийн дагуу хамрагдаж байна.
Авто тээврийн цех, Хүний нөөц, захиргааны хэлтэстэй хамтран энэ сарын 27-нд Комацу брэндийн 8 автомашин ашиглалтад хүлээн авах үйл ажиллагааны бэлтгэл хангаж байна.
Баяжуулах үйлдвэрийнхэн Онцгой даалгаварт ажил гүйцэтгэж, гурван долоо хоногийн хугацаанд ажиллаж, 11-р худгийн нуурын уснаас 18 метрийн гүнд байсан 1400 мм-ийн голчтой гурван ширхэг ган хоолойг гүйцэд хааж дуусгасан байна. Энэхүү өндөр эрсдэлтэй ажилд хамтран ажилласан Гэрээт Гал түймэр унтраах, аврах 058-р ангийн хамт олонд талархал илэрхийллээ.
Дулааны цахилгаан станцын Их зогсолт тодорхой шалтгааны улмаас хойшилж, энэ 7 хоногийн амралтын өдрүүдэд хийгдэхээр хугацааг төлөвлөн, баталгаажуулахаар хүлээгдэж байна.
НҮБ-ын Цөлжилттэй тэмцэх конвенцын Талуудын 17-р бага хурал буюу UNCCD COP17 олон улсын бага хурал энэ сарын 17-ноос 28-ны өдрүүдэд Улаанбаатар хотноо зохион байгуулагдаж, Эрдэнэт үйлдвэр онцгой ач холбогдол өгч оролцож байгааг Ерөнхий захирал Г.Ёндон шуурхай зөвлөгөөний үеэр хэлсэн. Мөн “Чингис хаан баялгийн сан нэгдэл”-ээс Эрдэнэт үйлдвэрийн 2026 оны эхний хагас жилийн үйл ажиллагааг “Хангалттай” дүнгээр үнэлснийг дуулгаж, бүтцийн нэгжийн удирдлагуудаар дамжуулан, нийт Уурхайчдадаа баяр хүргэлээ.
Эрдэнэт үйлдвэрийн дэргэдэх сургууль, цэцэрлэг болон хүүхдийн “Энэрэл” төвд засварын ажил гүйцэтгэж буй Барилга засварын цех болон холбогдох цех, нэгжүүд хичээлийн шинэ жилийн бэлтгэлийг бүрэн хангаж, засварын ажлуудыг хугацаанд нь чанартай дуусгахад онцгой анхаарч ажиллахыг шуурхай зөвлөгөөнөөс үүрэг болголоо.
Нар минутад мандаж минутад жаргана.
Үс засуулвал: 
Суудал: 
