НҮБ-ын Цөлжилттэй тэмцэх тухай конвенцын Талуудын 17 дугаар бага хурлын Ногоон бүсэд “Тэсвэртэй байдлын өдөр”-ийн үйл ажиллагааг өнөөдөр "Эрдэнэт үйлдвэр" ТӨҮГ хариуцан зохион байгуулж байна. Энэ өдөр бага хурлын төлөөлөгчдөд, хөгжлийн түншүүд, иргэний нийгмийн байгууллагууд болон бусад оролцогч талуудад "Чингис хаан баялгийн сан нэгдэл"-ийн бүрэлдэхүүн компаниуд экосистемийн урт хугацааны тогтвортой байдал, уур амьсгалын өөрчлөлт, ган, газрын доройтолд дасан зохицох шийдлүүд, биологийн олон янз байдлын хамгаалал, уул уурхайн бүсэд амьдарч буй иргэдэд чиглэсэн үйл ажиллагаагаа танилцуулж байгаа юм.
“Тэсвэртэй байдлын өдөр”-ийг нээж, “Эрдэнэт үйлдвэр” ТӨҮГ-ын Ерөнхий захирал Г.Ёндон үг хэлэхдээ, "Өнөөдөр бидний ярьж буй уур амьсгалын өөрчлөлт, цөлжилт, газрын доройтол, биологийн олон янз байдлын асуудал бол угтаа хүн төрөлхтний амьдралын үндэс болсон газар, ус, хөрс, экосистем, хүнс, амьжиргаа, эдийн засгийн аюулгүй байдлын ирээдүйн тухай юм" хэмээгээд, уур амьсгалын өөрчлөлттэй тэмцэхэд хоёр зүйлийг зэрэг хийх шаардлагатайг онцлов. Тухайлбал, Уур амьсгалын өөрчлөлтийн шалтгаан, эрсдэлийг сааруулах, өөрчлөлтийн нөлөөг даван туулах, дасан зохицох, тэсвэртэй байдлыг бий болгох. Хүлэмжийн хийн ялгарлыг бууруулахын зэрэгцээ усны нөөцөө, экосистемээ хамгаалж, хөрсөө сэргээж, үйлдвэрлэлээ уур амьсгалын эрсдэлд тэсвэртэй болгох ёстой. Эрдэнэт үйлдвэр бол Монгол Улсын эдийн засгийн хөгжилд онцгой үүрэгтэй, томоохон аж ахуйн нэгжийн хувьд байгаль орчныг хамгаалах, учирч болох сөрөг нөлөөллөөс урьдчилан сэргийлэх, байгалийн баялгийг зохистой ашиглах, эвдэрсэн газрыг нөхөн сэргээх асуудлыг үйл ажиллагааныхаа салшгүй хэсэг гэж үздэг. Байгаль орчны удирдлагын тогтолцооны менежментийн ISO 14001:2004 стандартыг үйл ажиллагаандаа нэвтрүүлж эхэлсэн Монголын анхны уурхай болсон нь ч энэ хандлагын нэг илэрхийлэл" гэдгийг тодотгосон.
Эрдэнэт үйлдвэр оролцогчдод хандаж, туршлагаа хуваалцъя, технологио танилцуулъя, шинжлэх ухаан, инновацдаа хөрөнгө оруулъя, байгальд ээлтэй санхүүжилтийг нэмэгдүүлье, төр, бизнес, шинжлэх ухаан, орон нутаг, иргэдийн түншлэлийг бэхжүүлье. Хамгийн чухал нь амлалтаас үйл ажиллагаанд, үйл ажиллагаанаас бодит үр дүнд, эндээс тогтвортой өөрчлөлтөд шилжицгээе, хэмээн уриалав.
Энэ үеэр Байгаль орчин, ногоон хөгжлийн хэлтсийн дарга Ж.Жавхланбат “Биологийн олон янз байдлын хамгаалал”, Эдийн засгийн хэлтсийн тэргүүлэх эдийн засагч Ц.Оюунболор “Байгаль орчин, нийгэм, засаглалын удирдлага, Эрчим хүчний хэлтсийн менежер Б.Болдбаяр “Эрчим хүчний хэмнэлт” сэдвээр илтгэл танилцуулан хэлэлцүүлж байна.
Нар минутад мандаж минутад жаргана.
Үс засуулвал: 
Суудал: 
