“Эрдэнэт үйлдвэр” ТӨҮГ-ын Нийгмийн харилцааны хэлтсийн дарга Д.Өнөбат, “Эрдэнэт” сувиллын цогцолбор, Хойд бүсийн хавдрын эмчилгээ, оношилгооны дэд төвийн удирдлагуудыг хүлээн авч, ажилтнуудын эрүүл мэндийн урьдчилан сэргийлэх үзлэгийн явц, үр дүн, өвчлөл бууруулах чиглэлээр цаашид хэрэгжүүлэх хөтөлбөрүүдийн талаар санал солилцлоо.
Эрүүл мэндийн урьдчилан сэргийлэх үзлэг тавдугаар сарын 06-нд албан ёсоор эхэлснээс хойш өнөөдрийн байдлаар тус үзлэгт 3494 ажилтан хамрагдаад байна. Үүнд 2849 ажилтан, 540 ахмад, үйлдвэрлэлийн осол болон мэргэжлээс шалтгаалах өвчний улмаас хувь тогтоолгосон 105 иргэн багтжээ.
Энэ удаагийн урьдчилан сэргийлэх үзлэгийг өмнөх жилүүдээс өргөжүүлж, нарийн мэргэжлийн оношилгоо, шинжилгээний үндсэн 12 багцаас гадна үйлдвэрийн хэвийн бус нөхцөлд хөдөлмөр эрхэлдэг ажилтнуудын мэргэжлээс шалтгаалах өвчлөлийг эрт илрүүлэх, оношлох зорилгоор ХАБЭА-н хэлтэстэй хамтран, нэмэлтээр зургаан багц боловсруулан хэрэгжүүлж байна.
Одоогоор урьдчилан сэргийлэх үзлэгт хамрагдсан ажилтнуудын 47 хувь нь “ХАБ-ын багц” үзлэгт хамрагдсан талаар “Эрдэнэт” сувиллын статистикч эмч Ж.Эрдэнэчимэг мэдээлэв.
Мөн энэ жил бүх ажилтныг В, С вирус болон хүний хөхөнцрийн вирус буюу папилломавирусын халдвар илрүүлэх шинжилгээнд хамруулж байгааг онцоллоо. Эдгээр вирус нь хавдар үүсгэгч шалтгаан болдог учраас сэргийлэх боломжтой хавдруудыг эрт илрүүлэх ач холбогдолтой юм.
Түүнчлэн, амьсгалаар хеликобактер илрүүлэх шинжилгээг энэ жил хийж эхэлсэн бөгөөд үзлэгийн дүнгээр ажилтнуудын дунд хеликобактерийн халдвар болон хоол боловсруулах замын үрэвсэлт өвчлөл өндөр байгаа нь ажиглагджээ. Иймээс энэ төрлийн өвчлөлийг бууруулахад чиглэсэн хөтөлбөрүүд хэрэгжүүлэх, эмэгтэйчүүдэд папилломавирусын халдвар харьцангуй бага байгаа үед нь вакцинд хамруулах, мөн В вирусгүй ажилчдаа вакцинд хамруулах зэргээр өвчлөлөөс урьдчилан сэргийлэх боломжуудын талаар Хойд бүсийн хавдрын эмчилгээ, оношилгооны дэд төвийн захирал Ж.Жавхлан танилцуулж, санал солилцсон юм.
Уулзалтаар урьдчилан сэргийлэх үзлэгийн явцад тулгамдаж буй асуудлуудыг хэлэлцэн, ажилтнуудын эрүүл мэндийг хамгаалах, өвчлөлөөс урьдчилан сэргийлэх чиглэлээр бодитой арга хэмжээ авч ажиллахад санал нэгдэв.
Нар минутад мандаж минутад жаргана.
Үс засуулвал: 
Суудал: 
