"Эрдэнэт үйлдвэр" ТӨҮГ-ын бүтцийн нэгжүүдийн 2026 оны эхний хагас жилийн үйл ажиллагааны тайлангийн хурал өнөөдөр Захиргааны I байрны хурлын танхимд эхэллээ. Тайлангийн хурал долоодугаар сарын 29-нөөс 31-ний өдрүүдэд үргэлжилж, үйлдвэрийн болон нийгмийн, нийтлэг үйлчилгээний чиглэлийн 27 бүтцийн нэгж эхний хагас жилийн үйл ажиллагааныхаа үр дүнг танилцуулан, хэрэгжүүлсэн ажил, үйлдвэрлэл, техник, технологи, эдийн засгийн үзүүлэлт, цаашдын зорилт, төлөвлөгөөгөө хэлэлцэж байна.
Эхний өдөр Ил уурхай, Авто тээврийн цех, Баяжуулах үйлдвэр, Геологи, хайгуулын экспедици, Чанарын хяналтын хэлтэс, Холбоо, мэдээллийн технологи, автоматжуулалтын цех, Тээвэр, ложистикийн төв, Судалгаа, шинжилгээний хүрээлэн, Ус хангамжийн цех, Цахилгаан цехийн хамт олон тайлангаа танилцууллаа.
Үйлдвэрлэлийн үндсэн цехүүдийн нэг Баяжуулах үйлдвэрийн хувьд 2026 оны эхний хагас жилд үйлдвэрлэлийн үндсэн бүх үзүүлэлтээ төлөвлөгөөнөөс давуулан биелүүлсэн амжилтыг тайландаа онцлов. Тодруулбал, хүдэр боловсруулалтын төлөвлөгөөг 526 мянган тонноор давуулан биелүүлж, зэсийн баяжмалд 3,740.03 тонн зэс, молибдены баяжмалд 97.45 тонн молибденыг төлөвлөгөөнөөс илүү үйлдвэрлэжээ. Мөн зэс авалтыг 0.48 хувь, молибден авалтыг 1.87 хувиар тус тус давуулан биелүүлснээр үйлдвэрлэлийн үндсэн бүх үзүүлэлт 100-аас дээш хувийн биелэлттэй гарсан байна. Үүнээс гадна нийт зардлыг 685.74 тэрбум төгрөгөөр төлөвлөснөөс 681.17 тэрбум төгрөгөөр гүйцэтгэн 4.57 тэрбум төгрөгийн хэмнэлттэй ажиллаж, нэг тонн хүдэр боловсруулалтын өөрийн өртгийг төлөвлөгөөтэй харьцуулахад 3.24 хувиар бууруулсан нь үйлдвэрлэлийн үр ашиг, зардлын удирдлагыг сайжруулсны илрэл болсныг онцлон танилцууллаа.
Тайлангийн хурлыг "Эрдэнэт үйлдвэр" ТӨҮГ-ын Үйлдвэрлэл, техникийн бодлогын газрын дарга П.Батболор ахалж, холбогдох газар, хэлтсийн удирдлагууд болон ажлын хэсгийн гишүүд тайлангийн үр дүнг хэлэлцэн дүгнэлт гаргаж байна.
Тайлангийн хурлаар бүтцийн нэгжүүдийн үйл ажиллагааны үр дүн, төлөвлөгөөний биелэлт, үйлдвэрлэлийн үр ашиг, бүтээмжийг нэгтгэн үнэлэхийн зэрэгцээ цаашид хэрэгжүүлэх үйл ажиллагаа, хөгжлийн зорилтыг тодорхойлох санал, зөвлөмжийг хэлэлцэж байгаа юм.
Нар минутад мандаж минутад жаргана.
Үс засуулвал: 
Суудал: 
