Монгол Улсын уул уурхайн салбарын стратегийн томоохон төсөл болох "Зэсийн баяжмал хайлуулах, боловсруулах үйлдвэр"-ийн төслийн хөрөнгө оруулагч NFC компанитай хийх албан ёсны хэлэлцээ эхэлж, талууд анхны цахим уулзалтаа зохион байгууллаа.
Уулзалтаар төслийн хэрэгжилтийг тодорхойлох хөрөнгө оруулалт, санхүүжилтийн бүтэц, хувьцаа эзэмшлийн зарчим, EPC буюу зураг төсөл, худалдан авалт, барилга угсралтын гэрээ, хэрэгжүүлэх хугацаа, үе шат, засаглал, хяналтын тогтолцоо, Монгол ажиллах хүчийг бэлтгэх, технологи дамжуулах, төлбөрийн нөхцөл, эрсдэлийн хуваарилалт зэрэг гол асуудлуудыг хэлэлцэж, Монголын талаас хөрөнгө оруулагчид найман бүлэг бүхий нэмэлт тодруулгыг хүргүүлэв.
Монголын тал төслийг Монгол Улсын хууль тогтоомжид бүрэн нийцүүлж, үндэсний эрх ашиг, харилцан ашигтай хамтын ажиллагааны зарчмыг чанд баримтлан хэрэгжүүлэх байр сууриа илэрхийллээ.
Цаашид талууд техник, эдийн засгийн үндэслэл, санхүүжилт, хууль эрх зүй, инженерчлэлийн чиглэлээр үе шаттай хэлэлцээг үргэлжлүүлэхээр тохиролцов.
Төсөл хэрэгжиж, үйлдвэр ашиглалтад орсноор зэсийн баяжмалыг эх орондоо боловсруулж, нэмүү өртөг шингэсэн экспортын бүтээгдэхүүн үйлдвэрлэх, экспортын орлого болон валютын урсгалыг нэмэгдүүлэх, өндөр бүтээмжтэй ажлын байр шинээр бий болгох, Монгол инженер, мэргэжилтнүүдийн технологийн мэдлэг, ур чадварыг шинэ түвшинд хүргэх, Үндэсний баялгийн сангийн орлогыг өсгөж, иргэдэд хүртэх үр өгөөжийг нэмэгдүүлэх чухал ач холбогдолтой юм.
Энэхүү төсөл нь Монгол Улсыг түүхий эд экспортлогчоос нэмүү өртөг шингэсэн бүтээгдэхүүн үйлдвэрлэгч орон болох зорилгыг бодитоор хэрэгжүүлэх стратегийн чухал алхам болж байна.
Анхны цахим уулзалтад "Чингис хаан баялгийн сан нэгдэл" ХХК-ийн Төлөөлөн удирдах зөвлөлийн дарга Д.Цолмон, Гүйцэтгэх захирал Б.Даваадалай, "Эрдэнэт үйлдвэр" ТӨҮГ-ын Ерөнхий захирал Г.Ёндон болон Засгийн газрын Хэрэг эрхлэх газар, Аж үйлдвэр, эрдэс баялгийн яам, Эдийн засаг, хөгжлийн яамны төлөөлөл оролцлоо. “Эрдэнэт үйлдвэр” ТӨҮГ-ыг түшиглэн байгуулах энэхүү үйлдвэр ашиглалтад орсноор дан ганц экспортлогч бус баялгаа боловсруулж, иргэн бүрдээ баялгийн өгөөжийг хүртээх юм.
Нар минутад мандаж минутад жаргана.
Үс засуулвал: 
Суудал: 
