Ил уурхайн захиргаа, Эцэг эхийн зөвлөл хамтран, ажилчдынхаа гэр бүлийн гишүүдэд зориулсан уулзалт зохион байгуулж, уурхайн үйлдвэрлэлийн үйл ажиллагааг газар дээр нь танилцууллаа.
Уулзалтын үеэр уурхайчдын ар гэрийнхэн уул уурхайн үйлдвэрлэлийн онцлог, ажлын орчин нөхцөл, аюулгүй ажиллагааны талаар дэлгэрэнгүй мэдээлэл авч, өдөр тутам хүнд нөхцөлд хөдөлмөрлөж буй ханийнхаа, хүү, охиныхоо, аав, ээж, ах, эгчийнхээ ажлыг илүү сайн ойлгох боломж бүрдэв.
Уулзалтын уур амьсгал халуун дотно өрнөж, уул уурхайн хүнд үйлдвэрт ээлжээр ажилладаг хүний бие, сэтгэлийг амгалан тайван амрааж байхын чухлыг онцлон ярилцлаа. Үйлдвэрчний эвлэлийн холбооны хуульч М.Шаравнямбуу үйлдвэрлэлийн осол юунаас үүдэн гардаг, ослын хор уршгийг хэн илүү ихээр амсдаг талаар бодит тохиолдлуудад тулгуурлан ярьж, мөн хорт зуршил, хортой бүтээгдэхүүний нөлөөллийн талаар сонирхолтой мэдээлэл хүргэв.
Мөн Ил уурхайн даргын үүргийг түр орлон гүйцэтгэгч, Үйлдвэрлэл, техникийн хэлтсийн Ерөнхий уурхайчин Д.Эрдэнэбаатар үйлдвэрийн газрын бүтэц, үйл ажиллагааны талаар танилцуулж, үйлдвэрлэлийн үндсэн цех болох Ил уурхайд геологийн дээж авч, хүдрийн агуулгыг тодорхойлохоос эхлээд тэсэлгээний цооног өрөмдөх, тэсрэх бодисоор цэнэглэх, уулын чулуулгийг тэсэлж бутлан сийрэгжүүлэх, хүдэр ухаж ачих зэрэг ажил дарааллын дагуу явагддаг болохыг дэлгэрэнгүй тайлбарлав.
Өнөөдрийн байдлаар Ил уурхайн ажилчдын 50 хувь нь 12 цагийн ээлжээр ажиллаж байна. Анх далайн түвшнээс дээш 1605 метрийн өндөрт уулын орой оршиж байсан бол өнөөдөр 1130 метрийн түвшинд хүрч, 475 метрээр доошилжээ. Уурхайн одоогийн амсраас 270 метрээр гүнзгийрсэн байна. Үйлдвэрлэлийн хүчин чадлын өсөлтийг харуулахад, 1994 онд 14.5 сая шоо метр уулын цул олборлож байсан бол 2026 онд энэ хэмжээ 34 сая шоо метрт хүрч өссөн. Ил уурхайд өнөөдөр 10–18 м3 багтаамжтай шанагатай 14 экскаватор, 250 мм-ийн диаметртэй өрмийн найман машин тасралтгүй ажиллаж байна.
Эцэг эхийн зөвлөлийн дарга Ц.Шинэдорж гэр бүлийн гишүүдээ ойлгож дэмжих, тэдний хүсэл сонирхлыг мэдэрч, сэтгэл санааны тогтвортой байдлыг хангахын ач холбогдлын талаар өөрийн амьдралын бодит туршлагаас хуваалцан, чин сэтгэлийн зөвлөгөө өглөө.
Уулзалтын төгсгөлд, уурхайчдын ар гэрийнхэн үйлдвэрийн ажилчидтай хамт өдрийн хоол идэж, Ил уурхайтай газар дээр нь танилцан, тэсэлгээ үзэж, дурсгалын зураг татуулж нэгэн өдрийг тун сонирхолтой өнгөрүүлэв.
Энэхүү уулзалт, танилцах аялал нь уурхайчдын ар гэрийнхэнд үйлдвэрлэлийн бодит орчин, ажлын онцлогийг ойлгуулахаас гадна хөдөлмөрийн аюулгүй байдал, гэр бүлийн дэмжлэг ямар үнэ цэнтэй болохыг мэдрүүлсэн ач холбогдолтой үйл ажиллагаа боллоо.
Нар минутад мандаж минутад жаргана.
Үс засуулвал: 
Суудал: 
